Vandom meydanı (fr.Place Vendôme), əvvəlki "Böyük Lüdovik meydanı" (fr.Place Louis le Grand) — Parisin "beş kral meydanından" biri. Vandom meydanı Parisin Paris operasının yaxınlığında yerləşir. Meydana Paris metrosunun 3,7,8 xətləri ilə yetişmək mümkündür. Vandom meydanı 1699-cu ildə XIV Lüdovikin şərəfinə memar Jyulya Arduen Mansara tərəfindən layihələşdirilərək salınmışdır. Meydan öz adını Sezar de Vandom sarayından götürmüşdür. Belə ki, 1720-ci ildə inşaası tamamlanan, klassisizm memarlıq üslubunda olan Sezar de Vandom sarayı meydanı əhatə edir. Meydanın mərkəzində 44 m hündürlüyündə Romadakı Trayan sütununun bənzəri olan Vandom sütunu ucalmaqdadır. Sütunun ucunda Napoleonun heykəli qoyulmuşdur.
Meydanın qərb hissəsində, № 15-də 1898-ci ildə Sezar Riç tərəfindən əsası qoyulmuş, 1979-cu ildən milyarder Mohamed əl-Fayediyə məxsus olan, Koko Şanel (37 il hoteldə yaşamışdır), Çarli Çaplin, Ernest Heminquey, Marsel Prust və s. kimi bir çox görkəmli şəxslərin qalmış olduğu Ritç hoteli yerləşir. № 12-də 1849-cu ildə bəstəkar Şopen dünyasını dəyişmişdir. Həmin bu ünvanda III Napoleon öz gələcək həyat yoldaşı Yevgeniya ilə tanış olmuşdur. № 21-də 1934-cü ildən etibarən fransız moda və dizayn ustası moda evi yerləşir.
