Tomsk Politexnik Universitetində informasiya texnologiyalarının inkişafı təhsildə, elmi-tədqiqat fəaliyyətində və resursları idarə etmədə dünya təcrübəsindən istifadəni təmin edir. Bu sferada əsasən smart-təhsil prinsipləri üzrə elektron tədris mühitinin qurulması, bulud texnologiyalar əsasında universitetin partnyorlarının informasiya sistemləri ilə inteqrasiyada tədris resurslarının münasib bankının yaradılması, mürəkkəb trendlərin proqnozlaşdırılması üçün təşkilatın resurslarının planlaşdırılması sisteminin (ERP-sistemlər) tətbiqi məsələlərinə diqqət yetirilir.

Universitetin Distant Texnologiyalar Mərkəzində kompüter proqramları, interaktiv elektron sənədlər, videomateriallar, uyğunlaşdırılmış komplekslər istiqamətləri üzrə elektron tədris resursların hazırlanması həyata keçirilir. Sadalanan istiqamətlərdən hər biri bir neçə bölmə üzrə metodiki tədris materiallarını ehtiva edir. Mərkəzin öhdəsində videomaterialların istehsalı üçün videokameralar, videomontaj pultları, translyasiya avadanlığı ilə təchiz edilmiş iki çəkiliş pavilyonu var.

Ali məktəbin tələbələri və əməkdaşları "lms.tpu.ru" elektron resursunda avtorizasiyadan sonra hazırlanmış materiallarla asanlıqla tanış ola bilərlər.

Ali təhsil ocağında yeni metodların tətbiq olunduğu distant təhsil forması da uğurla həyata keçirilir. Bu növ təhsilin təşkili universitetin Distant Təhsil İnstitutu tərəfindən koordinasiya edilir.

Tomsk Politexnik Universiteti 10 ildən artıqdır ki, xarici tələbələrin təhsili ilə məşğul olur. Bu gün universitetdə dünyanın təqribən 40 ölkəsinin (Avstriya, Avstraliya, Braziliya, Banqladeş, Vyetnam, Almaniya, Konqo Demokratik Respublikası, Misir, Hindistan, İordaniya, İran, İrlandiya, İtaliya, İraq, Kanada, Kipr, Çin, Kolumbiya, Meksika, Monqolustan, Nigeriya, Pakistan, ABŞ, Sudan, Tayland, Çexiya, Şotlandiya, Cənubi Koreya və s.) 2100 vətəndaşı təhsil alır.

Xarici tələbələrin təlimi rus və ingilis dillərində həyata keçirilir. Universitetin beynəlxalq təhsil və dil kommunikasiyası institutu xarici tələbələri universitetdə uğurlu tədris və xarici tələbələrin qəbulu prosedurunun təminatı, akademik konsultasiyalar, viza dəstəyi, yataqxana və tibbi sığorta xidmətləri ilə təmin edir.

Xarici tələbələrin hazırlığı əsasən informatika və hesablama texnikası, tətbiqi informatika, neft-qaz işi, kimya texnologiyası, biotexnologiya, elektroenergetika və elektrotexnika, istilik energetikası və istilik texnikası, materialşünaslıq və materialların texnologiyası, elektronika, nanoelektronika, optotexnika, maşınqayırma, cihazqayırma, fizika, tətbiqi riyaziyyat, ekologiya və təbiətdən istifadə, iqtisadiyyat, idarəetmə, ticarət işi, ictimaiyyətlə xarici regionşünaslıq, turizm, reklam və əlaqələr, linqvistika istiqamətləri üzrə həyata keçirilir.

Bununla yanaşı, qısamüddətli dil kursları, hazırlıq kursları, akademik mübadilə proqramları və birgə maarifləndirici proqramlar əcnəbilərin ixtiyarına verilib.

Hal-hazırda Tomsk Politexnik Universiteti dünyanın 30 ölkəsinin 130-dan artıq universiteti ilə təhsil və elmi araşdırmalar sahəsində əməkdaşlıq müqavilələri bağlayıb. Avropanın aparıcı ali məktəbləri ilə elmi-tədris fəaliyyəti üzrə əməkdaşlığın genişləndirilməsi universitetin inkişafında xüsusi rol oynayıb.

Məsələn, Almaniyanın Karlsrue Universiteti ilə elmi əməkdaşlığının nəticəsi olaraq elektroenergetika və yüksək gərginliklər texnikası sahəsində birgə tədqiqatlara 1993-cü ildə başlanılıb. Hazırda ali məktəbin Karlsrue Universiteti ilə elmi əməkdaşlığı elektrotexnika və elektroenergetika, nanotexnologiyalar, fizika və ekologiya sahələri üzrə həyata keçirilir.

Eyni zamanda, səmərəli nanomaterialların tədqiqatı sahəsində Çexiya Texniki Universiteti ilə uğurlu birgə fəaliyyət təşkil olunub.

Beynəlxalq akademik mübadilələr haqqında razılaşmalar çərçivəsində tələbələr 18 ölkənin (Çexiya, Almaniya, Fransa, Çin, Cənubi Koreya, Belçika, Vyetnam, ABŞ, İtaliya, Avstriya, Portuqaliya, Danimarka və s.) ali təhsil ocaqlarında təhsillərini davam etdirmək imkanı əldə edirlər.

Tomsk Politexnik Universitetində Bolonya prosesi prinsiplərinin reallaşdırması çərçivəsində əsas tədris proqramının “Standarts and Guidelines for Quality Assurance in the European Higher Education Area” tələblərinə uyğunlaşdırılmış standartı təsdiq edilib.

Universitetdə zəngin kitabxana sistemi qurulub. Hal-hazırda kitabxana fondu müxtəlif elm sahələri üzrə 2,7 milyon, həmçinin elmi nəşrlərin 2,1 milyondan çox nüsxəsini əhatə edir. Bununla yanaşı, fondun bazasına elmi və tədris ədəbiyyat, dövri nəşrlər, kağız və elektron daşıyıcılarda informasiya və referat jurnalları, dissertasiyaların avtoreferatları, normativ texniki və patent sənədləşməsi, nadir kitablar və əlyazmalar daxildir. Hazırda universitetin elektron kitabxanasında elektron resursların həcmi 17 mini ötüb.

2012-ci ildə Tomsk Politexnik Universiteti “QS” World University Rankings - dünyanın aparıcı universitetlərinin reytinqində 601+-ci mövqedə qərar tutub. “QS” reytinqinin top-700-də yer almaqla universitet dünyanın aparıcı ali məktəbləri sırasına daxil ola bilib. Həmçinin “QS” reytinqində Rusiyanın 14 ali məktəbi arasında 10-cu mövqeyi tutub. Nəzərə alaq ki, ölkədə bu gün təxminən 700 dövlət ali məktəbi fəaliyyət göstərir.

• Cahangir Atakişiyev. .  (az.)