Seyidağa Mircabbar oğlu Həbibov 1919-cu il oktyabrın 26-da Bakının Maştağa kəndində dünyaya göz açmış və ailənin yeganə övladı olmuşdur. O, öncə Cəfər Cabbarlı adına 187 nömrəli umumtəhsil tam orta məktəbində bir neçə il oxumuş, sonra təhsilini Bakıdakı Bədəl bəy adına orta məktəbində davam etdirmişdir. Orta məktəbi bitirdikdən sonra 1937-ci ildə N.Nərimanov adına Azərbaycan Tibb İnstitutuna daxil olmuş, 3-cü kursdan təhsilini yarımçıq qoymuş, və 1940-cı ildə Azərbaycan Sənaye İnstitutuna (indi Azərbaycan Dövlət Neft və Sənaye Universiteti) daxil olmuşdur.

1941-ci ildə Böyük Vətən Müharibəsinin başlanması səbəbindən Seyidağa təhsilini yarımçıq qoymuş və yaşıdları kimi ölkəmizin (keçmiş SSRİ) müdafiəsi üçün ordu sıralarına qoşulmuş, ön cəbhəyə getmiş və döyüşlərdə tankçı kimi iştirak etmişdir. O, 1943-cü ildə Mozdok rayonu ətrafında gedən şiddətli döyüşlərdə ağır yaralandıqdan sonra arxa cəbhədə xidmət etməyə göndərilmişdir. Seyidağa 1945-ci ildə müharibə bitdikdən sonra yarımçıq qalmış təhsilini davam etdirmiş və 1950-ci ildə neft mütəxəssisi kimi ali təhsil almışdır.

O, əmək fəaliyyətinə öncə Bakının Ramana kəndinin neft mədənlərində neftçıxarma ustası kimi başlamışdır. Daha sonra Buzovna neft mədənlərində baş mühəndis, Qaz kontorunun rəisi və “Buzovnaneft”də mədən müdiri kimi məsul vəzifələrdə çalışmışdır. Seyidağa ona tapşırılan bütün vəzifələrin öhdəsindən bacarıqla gəlmiş, özünü istedadlı, səriştəli təşkilatçı kimi tanıtmışdır. Onun neftçıxartma sahəsində göstərdiyi xidmətlər dövlətimiz tərəfindən layiqincə qiymətləndirilmiş, müxtəlif medallar və fəxri fərmanlarla təltif olunmuşdur.

El arasında “İnjener Seyidağa” kimi tannmış şair 1987-ci il, iyun ayının 1-də vəfat etmişdir.

Seyidağa haqqında bilgiləri təqdim edərkən tanınmış publisistlər – Vaqif Əliyevin “Ruhun qidası eşqdir” və Sona Xəyalın “Bakı gülzarının bülbülləri” adlı kitablarından istifadə olunmuşdur.

Seyidağa 1952-ci ildə Bakının Məhəmmədli kəndindən olan Gülcahan Əhməd qızı (1927–2005) ilə ailə həyatı qurmuşdur. Şairin yeganə qızı Lalə var idi.

Seyidağa hələ uşaq yaşlarından, daha sonra yeniyetmə çağlarından şeirə, ədəbiyyata və incəsənətə böyük maraq göstərmişdir. Bu məşğuliyyət sonralar onun həyat tərzinə çevrilmiş, ömrünün sonuna kimi poeziya ilə məşğul olmuşdur. Ensiklopedik biliyə malik olan şairin istedadı bədii yaradıcılıq sahəsində özünü daha çox büruzə vermişdir. Məhəmməd Füzulinin, Seyid Əzim Şirvaninin, Əliağa Vahidin kitabları əlindən düşməyən Seyidağa bu mənəvi xəzinədən bəhrələnərək özü də klassik üslubda müxtəlif mündəricəli şeirlər yazmışdır. Onun qəzəlləri və satirik şeirləri “Azərbaycan”, “Kirpi” jurnallarında, “Azərbaycan müəllimi”, “Azərbaycan gəncləri”, “Ədəbiyyat və incəsənət” və s. kimi qəzetlərdə müntəzəm olaraq dərc edilmişdir.

1986-cı ildə “Yazıçı” nəşriyyatı tərəfindən hazırlanmış “Qəzəllər” toplusunda Seyidağanın 40-a yaxın qəzəli çap olunmuşdur. Kitabı tanınmış şair Məmməd İsmayıl tərtib etmişdir.

Əmək veteranı olmuş Seyidağanın qəzəlləri və müxtəlif səpkili şeirləri hələ sağlığında ikən xanəndələrin repertuarının bəzəyi olmuş və bu iş bu gün də davam etdirilməkdədir. Onun şeirlərinə müxtəlif mahnılar da bəstələnmişdir. Etiraf edək ki, bu mahnılardan ən çox sevilən və dillər əzbəri olanı sənətşünaslıq elmləri doktoru, professor Abbasqulu Nəcəfzadənin bəstələdiyi “Əhli müsəlmanım”dır (bəzən sadəcə, “Azərbaycanım” da deyilir). Mahnı Əməkdar artist Kəmalə Rəhimlinin ifasında daha çox sevilmiş və 2005-ci ildə Mosvada Ostankino TV-nin apardığı sorğu nəticəsində ilin ən gözəl mahnısı nominasiyasına layiq görülmüşdür . “Min bir mahnı” kitabında bu mahnının “Əhli müsəlmanım” adı ilə poetik mətni təqdim olunmuşdur.

2019-cu ildə Beynəlxalq Muğam Mərkəzində Seyidağa Həbibovun 100 illik yubileyi qeyd olunmuşdur.

• Xəyal S.H. (S.H.Hadıyeva). Bakı gülzarının bülbülləri. B.: MBM, 2011, s. 41–44 (128 s.)
• Min bir mahnı. Tərtibçi: Babayev R.X. VI nəşr. B.: MBM, 2012, s. 155 (560 s.)
• Əliyev V.Ə. Ruhun qidası eşqdir. B.: Azadlıq mətbəsi, 2009, s. 3–11 (158 s.)
• Qəzəllər. Tərtibçi M.İsmayıl. B.: Yazıçı, 1986, s. 4-47 (231 s.)