Sərraf Məmmədov 1965-ci il fevralın 10-da Füzuli rayonunun Mandı kəndində doğulmuşdur. İlk təhsilini Füzuli rayonunun Pirəhmədli kəndində alıb. 1983-cü ildə Yaroslav vilayətinin Rıbinsk şəhərində hərbi xidmətdə olub. Hərbi hissənin zəmanəti ilə İvanovo İnşaat-Mühəndisləri İnstitutuna oxumağa göndərilib. İnstitutu bitirənə qədər tikinti materialları və məmulatlarının texnologiyası kafedrasında əvvəlcə tədris ustası kimi, bir müddət sonra isə həmin kafedrada laboratoriya müdiri kimi fəaliyyət göstərib. Sərraf Məmmədov buranı bitirdikdən sonra təhsilini Şimal-Qərb Dövlət İdarəçilik Akademiyasında davam etdirir.Sərraf Məmmədov Akademiyada oxuduğu vaxtlarda idmanla da məşğul olmuşdur. 1991-ci ildən qara kəmər sahibi, 1992-ci ildən isə əlbəyaxa döyüş üzrə Rusiya çempionu olmuşdur.

1990-cı illərin əvvəllərindən etibarən kiçik ticarətlə sahibkarlıq fəaliyyətinə başlayan Sərraf Məmmədov daha sonralar istehsal sahəsinə keçmişdir. 1993-cü ildə İvanovo şəhərində yaradılmış “Azərbaycan” cəmiyyətinin sədr müavini olmuşdur. 2002-ci ildə S.Məmmədov “İki saylı yük maşınları avtonəqliyyat müəssisəsi” ASC-nin təsisçilərinin tərkibinə daxil oldu və müəssisənin direktorlar şurasının sədri seçildi.

“Azərbaycan” cəmiyyəti sayəsində Azərbaycan milli mədəniyyəti və dəyərləri İvanovo şəhərində layiqincə təmsil edilmişdir. Onun rəhbərliyi dövründə 1993-cü ildə cəmiyyətin təşəbbüsü ilə cəbhəyanı bölgələrə və Müdafiə Nazirliyinə dərman vasitələri yardım olaraq göndərilib. Həmçinin İvanovoda cəmiyyətin təşəbbüsü ilə Azərbaycan dilində tədris verən bazar günü məktəbi də açılmış və bölgədə yaşayan azərbaycanlılar öz uşaqlarını Azərbaycan dili öyrənə bilməsi üçün buraya göndərmişdilər.

2001-ci ildə Ümumrusiya Azərbaycan Konqresi təsis edilir. Qısa müddətdə İvanovo şəhərində yaşayan 700-dən çox azərbaycanlı ÜAK-ın ətrafında birləşdi və ÜAK İvanovo regional şöbəsi yaradıldı. Bu şöbənin rəhbəri isə Sərraf Məmmədov seçilmişdir. Sərraf Məmmədov rəhbər seçildikdən sonra ilk olaraq İvanovo şəhərində azərbaycandilli bazar günü məktəbi açdırmışdır. Məktəbə 67 nəfər şagird təhsil alırdı. Başqa millətlərdən isə 12 nəfər də azərbaycan dilini öyrənmək üçün bu məktəbdə təhsil alırdı. Şöbənin rəsmi mətbu orqanı “Azərbaycan – media” qəzeti idi. Bu qəzet sonralar Moskvada nəşr olunan “Azərbaycan konqresi” qəzeti ilə əlaqələr yaradıldı, bu qəzetdə vaxtaşırı İvanovo vilayəti və orada yaşayan azərbaycanlılar haqqında materiallar dərc edildi, həmin qəzetin vilayətdə də yayılmasına kömək göstərildi.

Sərraf Məmmədov 2005-ci ildə İvanovo şəhər Dumasının deputatı seçilmişdir. Seçkidən sonra o, şəhər dumasının “Yedinaya Rossiya” fraksiyasının və “Yedinaya Rossiya” partiyasının İvanovo şəhər siyasi şurasının üzvü seçildi. Eyni zamanda, İvanovo şəhər dumasının deputatı kimi iqtisadi siyasət və şəhər təsərufatı komitələrinin tərkibinə qatıldı.

Sərraf Məmmədova Rusiya və Azərbaycan arasındakı əlaqələrin möhkəmləndirilməsində həyata keçirdiyi xidmətlərə görə Rusiya Sülh Fondunun qızıl medalı verilib. 2006-ci ildə dünya azərbaycanlılarının həmrəyliyi sahəsində fəaliyyətinə və dövlətlər arasında mehriban qonşuluq münasibətlərinin yaranmasındakı səylərinə görə Azərbaycan Respublikasının Prezidenti İlham Əliyev tərəfindən Tərəqqi medalı ilə təltif edilib.

Sərraf Məmmədov 4 aprel 2020-ci ildə 55 yaşında vəfat etmişdir.