Ratatuy (fr. Ratatouille) — Pixar tərəfindən istehsal olunmuş 2007-ci ilin komediya-dram janrındakı cizgi filmi. Studiyanın sayca səkkizinci filmidir. Rejissor Bred Börd bu filmdə Yan Pinkavanın orijinal ideyasını böyük ekrana gətirib. Filmin adı həm fransız mətbəxinə aid olan yeməyə, həm də siçovul olan əsas personajın növünə istinad edir. Parisdə keçən film “Auguste Gusteau's” adlı restoranda aşpaz olmaq arzusunda olan istedadlı siçovul Remi haqqında ürəkaçan hekayə təqdim edir. Filmdə Remi həmin restoranda qab yuyan kimi çalışan səriştəsiz gənc oğlan Linqvini ilə tanış olur. İkisi dostlaşır və bir-birlərinə kömək edərək ləzzətli yeməklər hazırlamağı və uğurlu aşpaz olmağı bacarırlar.

Ratatuy
ing. Ratatouille
Janr	baddi-film[d], fleşbək filmi[d]
Rejissorlar	Bred Börd[d]
Ssenari müəllifi	Bred Börd[d]
Bəstəkar	Maykl Cakkino[d]
İstehsalçılar	Walt Disney Pictures, Pixar
Distribütor	Fórum Hungary[d], Netflix, Disney+
İlk baxış tarixi	29 iyun 2007, 19 oktyabr 2007, 3 oktyabr 2007, 28 iyun 2007
Müddət	111 dəq.
Büdcə	150.000.000 $
Gəlir	623.722.818 $, 206.445.654 $
Ölkə	ABŞ
	ingilis dili, fransız dili
Rəng	rəngli
IMDb
Mükafatları
Vikianbarda əlaqəli mediafayllar

“Ratatuy” filminin yaradılması üzərində işlər 2000-ci ildə Yan Pinkava film üçün ilk konsepsiyaları hazırlayanda başladı. O, layihənin ilkin mərhələlərində iştirak etsə də, son nəticədə filmin rejissoru olmamışdır. 2005-ci ildə o, hekayəyə inamı olmadığı üçün Pixar-dan üz döndərmişdir. Bundan sonra Bred Börddən rejissor kimi işə başlaması və hekayəni inkişaf etdirməsi üçün dəyişikliklər etməsi istəndi. Bred Börd və filmin istehsal komandasının bəzi üzvləri film üçün ideya və ilham almaq üçün Parisə səfər etdilər. Cizgi filmdəki yeməklərin real və iştahaaçan görünməsini istəyən komanda Fransa və ABŞ-dən olan peşəkar aşpazlardan kömək və məsləhət almışdır. Prodüser Bred Lüis “The French Laundry” restoranında işləyib və orada filmdə təsvir olunan confit byaldi adlı yeməyi hazırlamağı öyrənib. Filmin musiqisini Maykl Cakkino bəstələyib və Paris şəhərinin ab-havasından ilhamlanıb.

“Ratatuy” filminin ilk nümayişi 22 iyun 2007-ci ildə Los-Ancelesdəki Kodak Teatrında baş tutub. Film 29 iyun 2007-ci ildə ölkənin bütün kinoteatrlarında ekranları bəzəyib. Film dünya miqyasında 623,7 milyon dollar dəyərində gəlir əldə edib və tamaşaçıları heyrətləndirib. “Ratatuy” 2007-ci ilin ən çox gəlir gətirən filmlərindən altıncısı kimi kinoteatrlarda öz buraxılışını yekunlaşdırıb. Həmin ilin ikinci ən çox qazanan cizgi filmi olub və “Üçüncü Şrek” filmini üstələyə bilməyib. Film bir çox cəhətinə görə tənqidçilərdən yüksək qiymət alıb. Film "Ən Yaxşı Animasiya Filmi" nominasiyasında "Oskar"a layiq görülüb və çox sayda mükafata namizəd göstərilib. 2016-cı ildə BBC tərəfindən dünyanın hər yerindən olan tənqidçilər arasında keçirilən sorğuda "Ratatuy" XXI əsrin 100 ən yaxşı filmindən biri seçilib.