Qazançı nekropolu I — Culfa rayonunun Qazançı kəndindən şimal-şərqdə, uzunsov təpənin üstündə orta əsrlərə aid arxeoloji abidə.

Qazançı nekropolları
Ölkə	Azərbaycan
Şəhər	Culfa
Yerləşir	Qazançı kəndi
Aidiyyatı	Orta əsrlər
Üslubu
Azərbaycandakı tarixi abidələrin milli qeydiyyatı
Kateqoriya	Nekropol
Əhəmiyyəti	Ölkə əhəmiyyətli
Qazançı nekropolu

1991-ci ildə kəşfiyyat xarakterli tədqiqat işləri aparılmış, planı çıxarılmışdır. Qəbirlər qiblə istiqamətindədir. Əksəriyyətinin baş daşları yoxdur, sinə daşları kobud hazırlanmış, uzunsov və dördünc formadadır. Bir qrupu sandıq şəkillidir. Ərazidən gil qab qırıqları tapılmış, bir neçə qoç daşa təsadüf edilmişdir. Abidənin 13–17-ci əsrlərə aid olması ehtimal edilir.

Qazançı nekropolu II- Culfa rayonunun Qazançı kəndindən cənub-şərqdə, Əlincəçayın sağ sahilində orta əsrlərə aid arxeoloji abidə.

1991-ci ildə kəşfiyyat xarakterli tədqiqatlar aparılmışdır. Qəbirlər qiblə istiqamətindədir. Baş daşları saxlanmamışdır. Sinə daşları kobud hazırlanmış dördkünc və uzunsov formadadır. Bəzi sinə daşları yastıdır. İki qəbirin üzərində həndəsi xətlərin olduğu müəyyən edilmişdir. Məlumata görə qəbiristanda xeyli qoç fiqurlu qəbirüstü daşlar olmuşdur. Hazırda yalnız biri saxlanmışdır. Abidə çox güman ki 14–18-ci əsrlərə aiddir.