Seymur Babayev 1 aprel 1987-ci ildə Bakıda doğulub. 2004-cü ildə orta məktəbi bitirdikdən sonra Bakı Dövlət Universitetinin tarix fakültəsinə daxil olub. Müsahibələrində o, ixtisas sahəsinə olan sevgisinə baxmayaraq, həmişə səhnədə olmaq istədiyini qeyd etmişdir. 2008-ci ildə ali təhsilini bitirdikdən sonra Moskvaya getdi və orada ilk dəfə olaraq dreq kvinlerin səhnə fəaliyyətini kəşf etdi. Həmin sənətin bütün incəliklərini öyrəndikdən sonra Moskvada ilk dəfə səhnələrdə çıxış etdi, daha sonra təcrübə toplayıb doğma şəhəri Bakıya qayıtdı.

2010-cu ildə Ledi Slim Ukraynanın Odessa şəhərində keçirilən beynəlxalq drag queen yarışmasında Azərbaycanı təmsil etmişdir. Bu müsabiqənin finalında o, Birinci Vitse Miss International 2010 və Miss Tema Klub adlarına layiq görülür. Müsabiqə zamanı ukraynalı ekspertlər ona və onun Azərbaycan adından iştirakına xüsusi diqqət yetirirlər: "Bu gün Azərbaycandan olan iştirakçıya Tema Klubu lentini təqdim etmək üçün gözəl fürsət yarandı; bu münasibətlə o, orada inqilab etdi, çünki Azərbaycanda əvvəllər belə bir şey olmayıb, onun adı artıq tarixə keçib". Ledi Slimin şousunu həmin zamanda Azərbaycandan olan peşəkar sənətçilər də dəstəkləyib.

Azərbaycanın ilk dreq kvin artisti Ledi Slim ilk dəfə 2010-cu ildə Azərbaycanın televiziya kanallarından biri olan Space TV-də özünü elan etmişdi.

2011-ci ildə Ledi Slim Azərbaycanı yenidən təmsil etmək üçün beynəlxalq ing. Miss Flawless Queen müsabiqəsinə yola düşdü. Həmin müsabiqə Moldovanın paytaxtı Kişinyovda keçirilirdi. Orada Miss Elegant 2011 titulunu qazandı.

Sonrakı illərdə Ledi Slimin fəaliyyəti ölkədə tam qəbul edilməsə də, Azərbaycanda belə bir janrda bir sənətçinin meydana çıxması beynəlxalq ictimaiyyətin, o cümlədən Açıq Cəmiyyət Fondlarının yaradıcısı, iş adamı Corc Sorosun fondunun da diqqətini cəlb edə bildi. Azərbaycan Fotoqraflar Birliyinin həmtəsisçisi Mirnaib Həsənoğlu Ledi Slimin həyatını sənədləşdirdiyi qısa film Açıq Cəmiyyət Fondları üçün çəkilmişdir. Film sənətçinin gündəlik və səhnə həyatını əks etdirən fotoşəkillərdən ibarətdir. Əsas məqsəd Azərbaycanda ilk travesti aktyorun üzləşdiyi çətinliklərə işıq salmaq idi.

Ledi Slim səhnəyə ilk çıxdığı vaxtdan Azərbaycan hökuməti tərəfindən daim təqiblərə, senzuraya və qadağalara məruz qaldığını qeyd edib. İlk dövrdə Seymurla eyni soyadı daşıyan dövlət məmurlarından biri ona televiziyada öz soyadından istifadə etməyi qadağan edir. Belə ki, səhnə adı Lady Slim olmamışdan əvvəl o, ing. Babayev's show adı altında çıxış edirdi. Daha sonra onun televiziyaya çıxması tamamilə qadağan edildi.BBC qeyd edir ki, hökumətin kütləvi mədəniyyətə nəzarət etməyə çalışdığı mühafizəkar Azərbaycanda müstəqil incəsənət çox da irəli getmir.

Ledi Slim son müsahibələrində səhnə fəaliyyətinin yalnız qastrol səfərlərindən ibarət olduğunu qeyd etmişdi.

2021-ci ildə Fransa mediası Ledi Slimdən aldığı müsahibəni yayımlayaraq onu Azərbaycanın drag kraliçası adlandırmışlar. Ledi Slim fransız fotoqraf Qreqori Herpenin də diqqətini çəkmişdir və o, Slimin şəklini çəkərək özünün Deep into Drag Queen layihəsinə əlavə etmişdi. Bu layihədə Ledi Slim minlərlə metal kəllədən hazırlanmış böyük kəllənin dilinə minir. Türkiyəli sənətkar Ahmet Güneştekinin bu əsəri Azərbaycanın paytaxtında İraq əsilli britaniyalı memar Zaha Hadidin layihəsi olan möhtəşəm müasir incəsənət muzeyinin önündə yer almışdı və orada çəkilmiş həmin fotoşəkil dünyanın bu hissəsində Drag Queen olmağın asan bir iş olmadığını simvolizə edir.

Cənubi Qafqazın az danışılan və işıqlandırılmayan problemlərinə diqqət yetirən beynəlxalq media platforması olan Chai Khana media insan hüquqları problemləri əsasında daha inklüziv cəmiyyətə yol açan mədəni hərəkatın nümayəndələri sırasında Ledi Slimin də adını çəkir. Əsası Tbilisidə qərarlaşan Çayxana medianın gənc, yaradıcı jurnalistlərinin fikrincə drag mədəniyyəti sadəcə əyləncə deyil, onlar Ledi Slimi cəsarətin, azadlığın və sosial normaları yenidən müəyyən etmək gücünün təcəssümü olaraq qeyd edirlər. Ledi Slim haqqında olan həmin məqalə 2023-cü il, oktyabrın 4 və 8 aralıqlarında Polşanın Krakov şəhərində n-ost-un bir hissəsi olan Unit layihəsinin təqdimatı keçirilən kitabında da çap edilib.Queer stories from Central Asia, Eastern Europe and South Caucasus adlanan həmin nəşrin incəsənət bölümündə (Art and Culture) "Azərbaycanın dreq ulduzu" başlığı altında məqalə nəşr edilmişdir.

Ledi Slim 2023-cü ilin sentyabr və oktyabr aylarında Gürcüstanın paytaxtı Tbilisidə keçirilən, eləcə də Almaniyanın Bərabər Hüquqlar Koalisiyasının həmsədrliyi çərçivəsində Almaniya Federal Xarici İşlər İdarəsi tərəfindən maliyyələşdirilən, Birləşmiş Millətlər Təşkilatının İnkişaf Proqramı (UNDP), Avropa İttifaqı və Norveçin dəstəyi ilə keçirilən beynəlxalq İnVisible festivalının açılışında çıxış etmişdir.