Yaşayış məntəqəsi mənşəcə Səfəvilərin hakimiyyət uğrunda mübarizəsində böyük rol oynamış qızılbaşların Qaradağlı tayfasının məskunlaşması nəticəsində yaranmışdır. Tayfa isə öz adını Cənubi Azərbaycanın Qaradağ mahalının adından almışdır. Səfəvilər hakimiyyətə keçdikdən sonra Qaradağlılar müxtəlif ərazilərə yayılmışlar. Qaradağlı adlı kəndlər də məhz həmin tayfaya məxsus ailələrin etnik adını əks etdirir. XX əsrin 30-cu illərinədək Laçın rayonunun Güləbird kəndi yaxınlığında da Qaradağlı adlı kənd olmuşdur. Bu kəndin adı Sarı Aşığın bir bayatısında çəkilir. XX əsrin 60-cı illərinədək Ermənistan ərazisində Qaradağlı adlı kənd qeydə alınmışdır.

XX əsrin 60-cı illərindən başlayaraq Əyriçayın üzərində suanbarı quruldu. Qaradağlı kəndində 10-dan artıq yaşayış evləri, orta məktəb və s obyektlər su anbarının altında qaldı.

Kəndə 9 illik orta məktəb, kitabxana, mədəniyyət evi və tibb məntəqəsi var.

Qaradağlı kəndi Şəki şəhərindən 16–17 km cənub-qərbdə, Əyriçayın sahilində yerləşir.

Kənddə 45-50 ev var.Kəndin əhalisi 266 nəfər təşkil edir ki, onun da 122 nəfəri kişi, 144 nəfəri isə qadındır.

Kənd əhalisi əsasən tütünçülük, taxılçılıq, tərəvəzçilik, heyvandarlıq ilə məşğul olur.