Qala xiyabanı Park-Bulvar kompleksi – Lənkəran şəhərinin Həzi Aslanov və Şirəli Axundov küçələrinin kəsişməsində yerləşən tarixi xiyaban. Xiyaban 2008-ci ilin oktyabrın 8-də yenidənqurma işlərindən sonra Park-Bulvar kompleksi kimi yenidən açılmışdır. Ətrafdakı küçələr abadlaşdırılaraq müasir görkəmə salınmışdır. Suda fırlanan qlobuslar buraya xüsusi yaraşıq verir. Fəvvarələrin quraşdırıldığı Park-Bulvar kompleksində Azərbaycanın Milli Qəhrəmanı Əsgər Əliyev adına Dostluq Parkı da salınmışdır. Ümumi sahəsi 1,6 hektardan çox olan parkda ölkəmizin bütün iqtisadi zonalarının göstəricilərini, eləcə də təbiətini, coğrafiyasını əks etdirən guşələr yaradılmışdır. Park-Bulvar kompleksi hər bölgə üzrə milli memarlıq abidələrindən ibarət maket də nümayiş etdirilir. Bu, təkcə lənkəranlıların deyil, həm də şəhərə gələn qonaqların Azərbaycan haqqında geniş məlumat almasına imkan yaradır. Burada əməkdar müəllim, Prezident təqaüdçüsü Mirhaşım Talışlı və Lənkəran Veteranlar Şurasının sədri Kamal Kələntərlinin heykəlləri də maraq doğurur.