Orta ölçülüdür. Azərbaycanda əldə edilmiş 56 fərdin kütləsi 6,3 -13,1 qram, bədənin uzunluğu 66,9 - 74,8 mm, quyruğu 35,5 – 43,0 mm, pəncəsi 10,0 -13,2 mm olmuşdur.

Arealı Qafqazı və Kiçik Asiyanın qonşu rayonlarını əhatə edir. Azərbaycanda Böyük və Kiçik Qafqazda d.s. 1700–2000 m –dən hündürlüklərdə yayılmışdır . Respublika ərazisində 2 yarımnövün olması mümkündür (lat. S.c.caucasica və lat. S.c.armenica).

Meşələrdə, kolluqlarda, çayların kənarında rütubətli yerlərdə məskunlaşır. Çox hərəkətli və cəld heyvandır. İlk rast gələn yuvada, torpaq yarıqlarında, daş yığınlarında, müxtəlif boşluqlarda gizlənə bilir. Azərbaycanda azsaylıdır. Apreldən oktyabrın sonuna qədər çoxalır və bu müddət ərzində dişi 2-3 nəsil verir. Əsasən onurğasızlarla (sərtqanadlılar, böcək , ikiqanadlılar, milçək, qarışqa , və s.) və xırda onurğalılarla (qurbağalar, kərtənkələlər, siçankimi gəmiricilər) qidalanır. Bir çoxu kənd təsərrüfatı bitkilərinə, meşələrə, çəmənlərə, eləcə də saxlanc yerlərində ərzaq məhsullarına ziyan vuran cücüləri böyük miqdarda məhv etməklə fayda verirlər. Leş yeməklə də təbiətdə müəyyən sanitar funksiyasını yerinə yetirir .

Sorex satunini