Nigar Sabir qızı Quliyeva 1976-cı il sentyabrın 15-də Bakı şəhərində anadan olub. Orta təhsilini 1983–1993-cü illərdə Bakının 20 saylı məktəb-liseyində alıb. Bakı Məktəbəqədər Pedaqoji Texnikumunda (indiki adı: Bakı Sosial Pedaqoji Kolleci) təhsilini davam etdirib. Ali təhsilini 1999–2004-cü illərdə Azərbaycan Dövlət Mədəniyyət və İncəsənət Universitetinin Mədəniyyətşünaslıq fakültəsində alıb.

1996-cü ildə Azərbaycan Radiosunda işə başlayıb. 2008-ci ildə fəaliyyətini İctimai Radioda davam etdirib. Televiziya fəaliyyətinə isə 2010-cu ildə İctimai Televiziyada başlayıb. Həmin ildən "Carçı" informasiya proqramının aparıcısı olub. 2018-ci ildə onun təqdimatı ilə ilk dəfə "İTV Xəbər Yekun" verilişi efirə çıxıb. 2019-cu ildən isə həm də "Diqqət mərkəzi" verilişinin aparıcısı olub. O, İctimai Televiziyanın dövlət başçısından müsahibə alan ilk aparıcısıdır. Hazırda bir sıra analitik verilişlərin, əsasən, "İTV Xəbər Yekun" proqramının aparıcısıdır.

2020-ci il iyulun 22-si Milli Mətbuat Günündə Prezident İlham Əliyevin sərəncamı ilə kütləvi informasiya vasitələrinin inkişafında xidmətlərinə görə "Tərəqqi" medalı ilə təltif edilib.