Nesl qalası skandalı (fr. Affaire de la tour de Nesle) — 1314-cü ildə Fransa monarx ailəsində baş tutan və o əsnada Fransa kralı olan IV Filippin 3 gəlininin xəyanətlə təqsirləndirildiyi hadisə. Şayələrin kralın qızı olan İngiltərə kraliçası Fransalı İzabella tərəfindən yayıldığı bilinir. İddialara görə, bu xəyanətlər əsasən Nesl qalasında (fr. Tour de Nesle) baş verdiyi üçün qala hadisəyə adını vermişdir. Skandal, hadisəyə adı qarışan saray əyanlarının edamı, işgəncəsi və həbsi ilə nəticələndi.

Fransa kralı IV Filippin 3 oğlu var idi: Lüdovik, Filipp və Çarlz. Dövrün ənənəsinə uyğun olaraq kral öz oğulları üçün güclü siyasi evliliklər planlamışdı. Böyük oğlu Lüdoviki 1305-ci ildə Burqundiya hersoqu qızı Marqaritayla, 1307-ci ildə ortancıl oğlu Filippi Burqundiya qrafı qızı Jannayla, 1308-ci ildə isə kiçik oğlu Çarlzı qrafın digər qızı Blanşla evləndirdi. Ancaq bu evliliklər bir-birindən çox fərqli idi. Lüdovik və Marqaritanın evliliyi xoşbəxt deyildi. Belə ki, Dalaşqan ləqəbiylə məşhurlaşan Lüdovik xanımıyla vaxt keçirməkdənsə, tennis oynamağı daha üstün tuturdu. Nisbətən daha mühafizəkar və dindar olan Çarlzla Blanşın evliliyi isə sıxıcı və ənənəvi idi. Filipp və Janna cütlüyü isə digərlərindən fərqli olaraq bir-birinə bağlı idi.