Məmmədəli Əsəgrov 1921-ci il dekabr ayının 18-də Bakının Suraxanı rayonunda neftçi ailəsində anadan olub. 1940-1943-cü illərdə M.F.Axundov adına Müəllimlər İnstitutunun (indiki Bakı Slavyan Universiteti) Ədəbiyyat fakültəsində təhsil alıb. Eyni zamanda, 1945-ci ildə Azərbaycan Dövlət Universiteti (indiki Bakı Dövlət Universiteti) Filologiya fakültəsinin qiyabi şöbəsini bitirib. İkinci dünya müharibəsi dövründə üç ay ön cəbhədə siravi əsgər alman-faşist işğalçılarına qarşı vuruşub, ağır yaralandığına görə 1942-ci ildə ildə təxris olunub.

Məmmədəli Əsəgrov 1943–1964-cü illərdə Bakıda 101 saylı orta məktəbdə Azərbaycan dili və ədəbiyyatı müəllimi kimi fəaliyyət göstərib.

1953–1955-ci illərdə "Azərbaycan gəncləri" qəzeti redaksiyasında Ədəbiyyat və incəsənət şöbəsinin müdiri işləyib.

1964–1969-cu illərdə Azərbaycan Müəllimləri Təkmilləşdirmə İnstitutunda Azərbaycan dili və ədəbiyyatı kabinetində metodist vəzifəsində çalışıb.

1969-1974-cü illərdə ADMİU-nun Səhnə nitqi kafedrasının baş müəllimi, dosenti, professoru və müdiri kimi incəsənət sahəsində yüksəkixtisaslı kadr hazırlığına mühüm töhfələr verib.

Tanınmış əruzşünas Məmmədəli Əsgərov maarifçilik sahəsində göstərdiyi xidmətlərinə görə 1972-ci ildə "Azərbaycan" Bilik cəmiyyəti tərəfindən Abbasqulu Ağa Bakıxanov adına fəxri diplomla təltif olunub.

Məmmədəli Əsgərovun 1965-ci ildə "Füzulini məktəbdə necə tədris etməli" adlı monoqrafiyası nəşr olunub. Bu nəşr, ikinci dəfə 2024-cü ildə latın qrafikası ilə yenidən ADMİU-nun mətbəəsi tərəfindən çap olunub. Müəllif, bu dəyərli tədqiqat əsərində Məhəmməd Füzulinin yaradıcılığının orta məktəblərdə tədrisi ilə əlaqədar məsələlərin qoyuluşu və həllində füzulişünaslıq elmimizin nailiyyətlərinə və respublikamızın məktəblərinin təcrübəsinə əsaslanmışdır. M.Füzulinin tədrisi məktəblərimizdə başlıca yerlərdən birini tutduğuna görə kitabda şairin həyat və yaradıcılığını tədris etmək üçün müəllimə daha çox faktiki material əldə etməkdə və effektli metodlar tapmaqda kömək etmək məqsədi əsas götürülmüşdür. Füzulişünaslıq elminin şair haqqında irəli sürdüyü bir sıra məsələləri bu nəşr öz həcminə görə əhatə etmədiyi üçün axırda xüsusi kitabiyyət verilmişdir. Ədəbiyyat müəllimləri kitabda tövsiyə olunan elmi-metodik mənbələrdən istifadə etməklə şagirdlərə daha çox bilik və məlumat verə bilərlər.

Onun 30-dan çox elmi məqaləsi respublikanın nüfuzlu jurnallarında çap edilib. Professor Məmmədəli Əsgərov bir neçə dərsliyin, metodiki vəsaitin və tədris proqramının müəllifidir.

Azərbaycan Dövlət Mədəniyyət və İncəsənət Universiteti