Azərbaycan Respublikasının Prezidenti İlham Əliyevin 30 yanvar 2006-cı il tarixli, 359 nömrəli Fərmanı ilə Azərbaycan Respublikasının Mədəniyyət Nazirliyi və Azərbaycan Respublikasının Gənclər, İdman və Turizm Nazirliyi ləğv edilmiş, Azərbaycan Respublikası Mədəniyyət Nazirliyi əsasında Mədəniyyət və Turizm Nazirliyi yaradılmışdır. Azərbaycan Respublikası Prezidentinin 18 aprel 2006-cı il tarixli 393 nömrəli Fərmanı ilə Mədəniyyət və Turizm Nazirliyi haqqında əsasnamə təsdiq edilmişdir. 20 aprel 2018-ci ildə Mədəniyyət və turizm sahəsində dövlət idarəçiliyinin təkmilləşdirilməsi ilə bağlı bəzi tədbirlər haqqında Azərbaycan Respublikası Prezidentinin Sərəncamına əsasən, Azərbaycan Respublikası Mədəniyyət və Turizm Nazirliyi ləğv edilmiş və onun əsasında Azərbaycan Respublikası Mədəniyyət Nazirliyi və Azərbaycan Respublikası Dövlət Turizm Agentliyi yaradılmışdır.

• Mədəni İrsin Qorunması, İnkişafı və Bərpası üzrə Dövlət Xidməti
• 28 teatr
• 6308 tarix və mədəniyyət abidəsi
• 1 sirk
• 12 konsert müəssisəsi
• 3985 kitabxana
• 2708 klub
• 189 dövlət muzeyi (filiallarla birlikdə)
• 234 uşaq musiqi, incəsənət və rəssamlıq məktəbi
• 33 rəsm qalereyası və sərgi salonu
• 21 dövlət qoruğu
• 60 mədəniyyət və istirahət parkı
• 1 zoopark
• Mədəniyyətşünaslıq üzrə Elmi-Metodiki Mərkəz
• 4 asudə vaxt Mərkəzi
• 6 təsərrüfat təşkilatı,
• "Azərbaycanfilm" də daxil olmaqla 7 film istehsalı studiya
• 134 şəhər və rayon kinoteatrı
• Dövlət Film Fondu (Naxçıvan filialı ilə birlikdə)
• Respublika Kitabxana Kollektoru
• bir qəzet ("Mədəniyyət")
• iki jurnal ("Mədəni-maarif" və "Pəncərə") redaksiyası
• Bakı Xoreoqrafiya Məktəbi
• Mədəniyyət İşçilərinin İxtisasartırma Mərkəzi
• Milli Kulinariya Mərkəzi
• 62 şəhər və rayon mədəniyyət və turizm şöbəsi
• Naxçıvan MR Mədəniyyət Nazirliyi
• Şəki Atçılıq Mərkəzi
• Lənkəran Uşaq düşərgəsi .

• müvafiq sahədə vahid dövlət siyasətinin formalaşmasında iştirak etmək və bu siyasətin həyata keçirilməsini təmin etmək;
• müvafiq sahədə normayaratma fəaliyyətini həyata keçirmək;
• müvafiq sahədə dövlət tənzimləməsini, dövlət nəzarətini və əlaqələndirməni həyata keçirmək;
• strukturuna daxil olan Mədəni İrsin Qorunması, İnkişafı və Bərpası üzrə Dövlət Xidməti vasitəsilə mədəni irsin qorunmasına, "İçərişəhər" Dövlət Tarix-Memarlıq və "Qala" Dövlət Tarix-Etnoqrafiya qoruqlarının əraziləri istisna olmaqla, dövlət mühafizəsində olan daşınmaz tarix və mədəniyyət obyektlərinin (abidələrinin) bərpasına, rekonstruksiyasına, konservasiyasına, yenidən qurulmasına, texniki təchizat vasitələrinin yeniləşdirilməsinə, cari və əsaslı təmir-bərpa işlərinin layihələndirilməsinə dövlət nəzarətini həyata keçirmək;
• müvafiq sahənin inkişafı üçün tədbirlər görmək.

Nazirliyin dövlətlərarası müqavilələrə uyğun olaraq Avropa, Asiya və İslam ölkələri, ABŞ və Latın Amerikası ilə beynəlxalq mədəniyyət proqramlarını həyata keçirir.

Nazirlik çoxtərəfli əməkdaşlıq çərçivəsində BMT, MDB, GUAM, Qaradəniz İqtisadi Əməkdaşlıq Təşkilatı, Avropa İttifaqı, İslam Konfransı Təşkilatı, YUNESKO, Dünya Turizm Təşkilatı, TÜRKSOY, İSESKO və digər beynəlxalq qurumlar vasitəsi ilə Azərbaycan mədəniyyətini dünyada təbliğ edir, eyni zamanda dünya mədəni sərvətlərinin Azərbaycanda tanıdılması sahəsində əhəmiyyətli proqramlar həyata keçirir.