Kitab klubu və ya daha uzun adı ilə kitab müzakirə klubu və yaxud oxu klubu — insanların müəyyən zaman fasilələri ilə görüşdükləri, əvvəllər oxuduqları kitablar haqqında fikirlərini bölüşdükləri, oxuduqları kitablardakı bəyəndikləri və bəyənmədikləri hissələri və personajları müzakirə etdikləri sosial tədbirdir.

İnsanlar belə tədbir üçün evlərdə, kafelərdə, kitabxanalarda yığışırlar. Restoranlarda yeməkdən sonra da belə yığıncaqların təşkil edilməsi mümkündür.

Klubun üzvləri digər gündəlik fəaliyyətlərinə görə həmişə müəyyən edilmiş yerdə və ya vaxtda görüşməkdə çətinlik çəkə bilərlər. Belə vəziyyətlərdə internetin yüksəlişi ilə yeni yaranmış onlayn kitab müzakirə forumları bu görüşlərin virtual mühitdə keçirilməsinə şərait yaradır.