Andre Bamberski 1937-ci ildə Valansyen şəhərində anadan olmuşdur. Atası Polşadan Fransa kömür mədənlərində işləməyə gəlmişdi. İkinci Dünya müharibəsi zamanı Andre Polşada babası və nənəsi ilə yaşayırdı. 1945-ci ildə Beynəlxalq Qırmızı Xaç Komitəsinin sayəsində Lill şəhərində valideynlərinə qovuşmuşdur. 1946-cı ildə Fransaya qayıdaraq təhsilini davam etdirdi və diplomlu mühasib oldu. 1962-ci ildə Əlcəzairdə 36 aylıq hərbi xidmətdən sonra Mərakeşin Kasablanka şəhərinə köçdü. Bamberski tezliklə Daniel Qonnin ilə evləndi və onların Kalinka (d. 5/7 avqust 1967) və Nikolas (d. təxminən 1970) adlı iki övladı oldu.

Diter Paul Kristian Krombax (alm. Dieter Paul Christian Krombach‎) 5 may 1935-ci ildə Drezdendə Vermaxt zabiti Valter və onun həyat yoldaşı Marianna Brendle ailəsində anadan olub. 9 yaşında Drezden bombardmanından sağ çıxa bildi. Frankfurt-Mayn şəhərində tibb fakültəsinə daxil oldu. Orada Krombax psixiatriya üzrə doktorluq dissertasiyası müdafiə etdi və tezliklə Sürixdə kardioloq kimi işləməyə başladı. 1963-cü ilin noyabrında Monika Hentze ilə evləndi. Ailənin Diana və Boris adlı iki övladı var idi. Evlilik uğurlu getmirdi, Krombax tez-tez Hentzeni döyür və onu öldürməklə hədələyirdi. Monikanın qardaşı Mikael Hentzenin dediklərinə əsasən, o zamanlar belə qəbul olduğu üçün bacısı Krombaxdan şikayət etməmişdi. Bəzi məlumatlara görə, Krombax tez-tez Hentzeyə vitamin inyeksiyaları vururdu. 1969-cu ildə Hentze xəstələnir, nəticədə səs və görmə qabiliyyətini itirir və iflic olur. Həmin ilin oktyabrında Hentze Frankfurt-Mayndə xəstəxanada beyindaxili qansızmadan öldü. Anasının dediyinə görə, bu hadisə Krombaxın həkimi qırağa çəkib ona “ilan zəhəri” vurmasından bir neçə saat sonra baş verdi. İnyeksiya ilə Hentzenin ölümü arasında heç bir əlaqə müəyyən edilmədi. Ölümün rəsmi səbəbi bazilyar arteriyanın trombozu qeyd olundu. Həyat yoldaşının ölümündən 10 ay sonra o, ikinci dəfə evləndi.\

Bamberski və Krombax ailələri 1974-cü ildə Kasablankada tanış olmuşdular. Məlum oldu ki, Krombax həkim, Bamberski isə mühasib olaraq hər ikisi Almaniya konsulluğunda işləyirmişlər. Həmçinin onların övladları eyni beynəlxalq məktəbdə oxuyurlarmış. Tezliklə Krombax və Qonnin arasında romantik münasibət başladı. Elə həmin il Bamberski ailəsi (Tuluzaya yaxın şəhərətrafı qəsəbə), Krombax isə Bavariyaya köçdü. 1975-ci ildə Qonnin Bamberskiyə Nitsada daşınmaz əmlak ofisində iş tapdığını və orada mənzil kirayə götürməyi planlaşdırdığını söylədi. O, Bamberskiyə işi və ya yaşayış yeri ilə bağlı hər hansı məlumat verməkdən imtina etdi. Həyat yoldaşının bu davranışı Bamberskini onu güdməyə vadar etdi. O, Qonnin Nitsanın yerinə Tuluzaya getdiyini aşkar etdi. O, yaşadığı evin konsyerjindən Qonnin haqqında soruşduqda konsyerj onu “madam Krombax” kimi tanıdığını bildirdi. Bu hadisədən sonra Bamberski Qonnindən, Krombax isə həyat yoldaşından boşandı. 1977-ci ildə Krombax və Qonnin evləndilər. Boşandıqdan sonra Kalinka və Nikolas ataları Bamberski ilə birlikdə Fransada yaşayırdılar.

1980-ci ilin iyulunda Bamberski uşaqları ilə birlikdə Mərakeşə qayıtmaq qərarına gəldi. Lakin Fransanı tərk etdikdən bir neçə gün sonra Qonnin onu Tuluza məhkəməsinə şikayət edərək, uşaqların qəyyumluğunu tələb etdi. Bamberskinin vəkili ona vəsatətlə mübarizə aparmamağı tövsiyə etdi, çünki məhkəmə işində Bamberskinin uşaqların anaları ilə görüşməsinə mane olması iddiası var idi. Qəyyumluğu Qonninə keçəndən sonra Bamberski yenidən Peşbüşkə köçdü. Elə həmin il uşaqlar Qonnin yanına şəhərinə köçdülər və Bamberski onlarla tətil zamanı görüşməyə razılaşdı.

9 iyul 1982-ci ildə Kalinka Boden gölündə vindsörfinq ilə məşğul olurdu. Saat 17 radələrində o, evə qayıtmış və anası və ögey atasının dediyinə görə, özünü pis hiss etdiyi barədə şikayətlənmişdi. Ailə 19:30-da şam yeməyinə başladı. Saat 22:00-da Kalinka bir stəkan su almaq üçün ayağa qalxdı. Krombaxın sözlərinə görə, o, yataq otağında saat 00:00-a qədər oxuyub, daha sonra isə ondan işığı söndürməsini istədi.

Krombaxın sözlərinə görə, ertəsi gün təxminən saat 10:00-da o, Kalinkanın cansız bədənini tapdı. Krombax bildirdi ki, o, qızı xilas etmək üçün onun ürəyinə birbaşa niketamid və ayağına iki novodiqal və izoptin inyeksiyalarını vurdu.

Təxminən səhər saat 10:30-da Qonnin Kalinkanın ölümü barədə Bamberskiyə məlumat verdi. O, Sürixə uçdu və hava limanında avtomobil icarəyə götürərək Lindauya sürdü. Ertəsi gün Bamberski Kalinkanın cəsədini görmək üçün xəstəxanaya gəldi. Ağ corab və qırmızı gecə paltarı hələ də cəsədin əynində idi O, Fransada, Peşbuskda dəfn edildi.

Dəfn mərasimindən sonra bir neçə həftə ərzində Bamberskinin qızının ölümü ilə bağlı heç bir şübhəsi yaranmamışdır. Lakin zaman keçdikcə Krombaxdan şübhələnməyə başladı. 1982-ci il oktyabrın əvvəlində Bamberski Kalinkanın 12 iyul 1982-ci il tarixli yarılma protokolunun surətini aldı. Cəsədin yarılması zamanı məlum oldu ki, ölüm səhər saat 03:00-04:00 arasında baş vermişdir. Həmçinin hesabata əsasən, yarılma Lindau polis rəisi, Kemptendən olan prokuror və Krombaxın özünün iştirakı ilə doktor Höhmann (Menningendən olan məhkəmə həkimi) tərəfindən aparılmışdır. Krombaxın öz ögey qızının yarılma prosesində iştirak etməsi Bamberskinin diqqətini çəkdi. Bundan əlavə, Bamberski hesabatda səhvlərin olduğuna fikir verdi. Məsələn, Höhmann Kalinkanın vajinasında qan, içərisində isə ağımtıl-yaşıl rəngli maddə aşkar etdi. Həkim Kalinkanın yuxarı sağ qolunda venadaxili Kobalt-Ferrlesit inyeksiyası nəticəsində yaranan təzə deşilmə izini də qeyd etdi. Hesabatda Krombax, günəş qaralmasına kömək etmək üçün ona nahardan əvvəl iynə vurduğunu bildirdi. Höhmann heç bir toksikoloji qan testini həyata keçirməmişdir. Həm də həkim Kalinkanın bakirə olub-olmadığını müəyyən etməmişdir. Hesabatda ölümün səbəbinin “naməlum” olduğu bildirilmişdir. Höhmann qeyd etmişdir ki, ancaq həkim nümunələri araşdırandan sonra ölümün səbəbi ilə bağlı yekun qərar verilməlidir. Bamberski test nəticələrini öyrənmək üçün Qonninə zəng edəndə o, Krombaxdan soruşacağını və ona zəng edəcəyini söylədi. Qonnin geri zəng etmədikdə, Bamberski iki gün sonra yenidən onunla əlaqə saxladı və cavabında heç bir sınaq keçirilmədiyini aldı. Bamberski hesabatın yenidən yoxlanılması üçün Tuluzadan iki məhkəmə ekspertinə müraciət etdi. Onlar onun şübhələrinin əsaslı olması ilə razılaşdılar. Ekspertlərin fikrincə, hesabat müəllifləri “nəyisə gizlətmək istəyirdilər”.

Bamberskinin vəkilləri əlavə testlər təyin etmək üçün Almaniyada yerli prokurora müraciət etdilər və 1983-cü ilin fevral və mart aylarında Münhen Tibb-Hüquq İnstitutunun tibbi məhkəmə eksperti toxuma nümunələrini araşdırdı. Tədqiqatın nəticələri Krombaxın versiyası ilə bağlı ilk rəsmi şübhələrə səbəb oldu. Şpann Krombaxı heç bir aşılayıcı təsiri olmayan və yalnız nadir hallarda anemiyanın müalicəsində istifadə edilən "təhlükəli" maddədən istifadə etdiyinə görə qınadı. Şpann Kobalt-Ferrlesit inyeksiyasının qızdırma, ürəkbulanma və qusmaya gətirdiyini və böyük dozanın qəbul edildiyi hallarda tənəffüs və ya ürəyin dayanmasına səbəb ola biləcəyini söylədi. Şpannın sözlərinə görə, iynə vurulduqdan sonra Kalinka anafilaktik şoka düşüb, huşunu itirib və qusma kütlələrində boğuldu. Şpann, Krombaxın iynə vurulması ilə Kalinkanın ölümü arasındakı vaxt haqqında yalan danışdığına qərar verdi, çünki immun müdafiə əlamətinin olmaması Kalinkanın demək olar ki, dərhal öldüyünü göstərirdi. Höhmannın Kalinkanın bakirəliyi ilə bağlı qərarını şübhə altına saldı. Höhmannın fikrincə, Kalinkanın cinsiyyət orqanın hissəsinin qopması ölümdən sonra baş verib və qızlıq pərdəsi cırılmayıb, bu da onun hələ bakirə olduğunun göstəricisidir. Bununla belə, Höhmannın "qızlıq pərdəsi kifayət qədər böyük" olduğunu etiraf etməsi onu göstərir ki, penetrasiya baş verə bilərdi.

Digər ekspert, farmakologiya professoru Peter S. Şonhofer belə qənaətə gəlmişdir ki, Kobalt-Ferrlesit inyeksiyasının venadaxili yeridilməsi çox güman ki, Bamberskinin ölümünə gətirib çıxartdı.

Prokuror sübut olmadığı üçün ekspertlərin rəylərini nəzərə almadı və 1983-cü ildə Kalinkanın ölümü ilə bağlı cinayət təhqiqatını dayandırdı. Bu qərarı Münhenin baş prokuroru da dəstəklədi. Onlar yarılmada qanun pozuntusuna dair sübutlar olduğu halda Krombaxla bağlı istintaqın niyə davam etdirilmədiyinə dair hər-hansısa izah vermədilər. Sonradan məlum oldu ki, evdə Kalinkanı öldüyünü bildirən təcili yardım həkimi hadisə yerinə polis çağırmamışdır. Krombaxın təkidi ilə meyit birbaşa morqa aparılmışdır.