Hüseyn Məhəmmədxani — Şair, nasir

1955-ci ildə Təbrizlə Salmas arasında yerləşən Güney mahalının Meşin kəndində anadan olub. İlk təhsilini orada, orta təhsilini isə Təbrizdə və Tehranda alıb. Bundan başqa, mərhum doktor M.T.Zehtabi və doktor Məhəmmədsədiq Hüseyn Məhəmmədzadə (Hüseyn Düzgün) özəl məktəblərində türk dilini və Azərbaycan ədəbiyyatını öyrənib. H.Məmmədxani "Varlıq" dərgisini özü üçün bir məktəb sayır. 13 yaşından şer yazır. Nəsrə isə islam inqilabından sonra keçib. Azərbaycan türkcəsində 22 əsərin yazılmasında və ərsəyə gəlməsində rolu olub. 40-dan çox kitabı hələ ki çap gözləyir. Müsahibim şer və nəsr əsərləri yazmaqla yanaşı, folklorumuzu araşdırır. "Bilici Bəhmu", "Zinəli bulaq", "Hərə bir yanda yatıb" şer kitabları çapdan çıxıb. Güneydəki şairlərin "Hər bağdan bir gül" şer məcmuəsini çap etdirib. "Dədə Qorqud kitabı" və oradakı söz və adların izahı" araşdırma əsəri çapdan çıxıb. "Meşin" monoqrafiyası üç il öncə oxuculara verilib. Kərəcdə yaşayan 70 yaşlı şair Dərviş Behrəvan İnallının "Pənahəli və Asiya" hekayəsinə, "Sönməz ellərin ocağı" və "Ana yurdum Buinzəhra" şer kitablarına redaktorluq edib. D.B.İnallı gənclik dövründə ilk məktəbi farsca oxuyub. Onun türk dilində yazı savadı olmadığından şerlərini audiokasetə yazdırır; sonra onu kitab halına gətirirlər. H.Məmmədxani 15 il öncə Güney mahalında yaşlılardan Azərbaycanın nağıl, əfsanə və dastanlarını toplayıb. Onlardan 40 dastan kitab halına gətirilmək üzrədir. 15 il öncə 90 yaşında vəfat etmiş və əslən Güney mahalından olan məşhur aşıq Qəşəm Cəfərlinin (Xəstə Qasımın 6-cı nəslindəndir) həyat və yaradıcılığı ilə bağlı kitab yazıb. Amma başqa kitablar kimi, o da çap edilməyib. Folklorumuzun qoruyucusu və onun toplayıcılarından olmuş mərhum araşdırıcı Əli Kəmali ilə əməkdaşlıq edib. Orta İran türklərinin toplanılmış rəvayət, nağıl və dastanları indiyədək çap üzü görməyib. Hazırda Dədə Qorqud üzrə araşdırmaları davam etdirir, evlidir, üç oğlu, bir qızı var.