Həyatının ilk illəriylə bağlı yetərli məlumat yoxdur. Əslən gürcü olub, saray hərəmində silahdar olaraq xidmət etdiyi bilinir. 1619-cu ildə vəzir rütbəsi alaraq divana daxil olan Kənan Paşa Qara dəniz sərdarlığına gətirildi və bu vəzifədə ikən quldur kazak dəstələriylə mübarizə apardı. 1627-ci ilin martında sədarət naibi Rəcəb Paşanın tövsiyəsi və Sultan Muradın əmriylə Rumeliyə göndərilən Kənan Paşa bölgədə mərkəzi hakimiyyəti gücləndirdi və üsyan çıxaran dəstələri zərərsizləşdirdi. Bu səbəblə 2 il davam edən bu vəzifəsinin ardından Ədirnəyə gələn Kənan Paşa Sultan Murad tərəfindən xələt geyindirilərək mükafatlandırıldı. Vəfatına qədər Sultan Murad, Sultan İbrahim və Sultan Mehmed səltənətlərində müxtəlif dövlət vəzifələrində xidmət edən Kənan Paşa 1634-cü ildə Sultan Əhmədin qızlarından Burnaz Atikə Sultanla nigahlandı.

Həmin il Ədirnəyə səyahət edən Sultan Murad tərəfindən İstanbul naibi elan olundu. 1635-ci ildə çıxılan İrəvan səfərinə vəzir ünvanıyla qatılan Kənan Paşa Ahıska qalasının fəth olunmasında mühüm rol oynadı. 1638-ci ildə Ərzurum bəylərbəyi təyin edilən Kənan Paşa ertəsi il Bağdad səfərindən dönən Sultan Muradı Sivas yaxınlığında qarşıladı və hədiyyələr təqdim etdi.

Sultan Muradın vəfatı və qardaşı Sultan İbrahimin taxta çıxmasının ardından siyasi karyerasına davam edən Kənan Paşa paytaxta çağırılaraq yenidən divan vəziri təyin edildi. 1641-ci ildə sədrəzəm Kəmankeş Mustafa Paşanın paytaxtdan uzaqlaşması səbəbilə sədarət naibi oldu. 1645-ci ildə Anadolu bəylərbəyi təyin edilsə də, həmin il yaşlılığı bəhanə edilərək külli miqdarda təqaüdlə vəzifədən alındı. Sultan İbrahimin devrilməsi və 7 yaşlı oğlu Sultan Mehmedin taxta çıxarılmasının ardından qaynanası Validə Mahpeykər Kösəm Sultan "Valide-yi kəbir" ünvanıyla yenidən taxt naibəsi təyin edildi. Beləcə, Kənan Paşa yenidən divan vəziri təyin olundu. Ancaq çox keçmədən Kənan Paşa 1652-ci ildə İstanbulda vəfat etdi.

• Tülün DEĞİRMENCİ.