Göydərə nekropolu, Culfa rayonunun Göydərə kəndindən şimal-qərbdə, hündür dağ yamacında yerləşir. Qərbdə dərə, şimalda dağ silsiləsi, şərqdə və cənubda Göydərə kəndi ilə əhatələnir.

Yaşayış yerində 1990–1991-ci illərdə kəşfiyyat хarakterli tədqiqat işləri aparılmışdır. Nekropoldakı qəbirlərin hamısı qərb-şərq istiqamətindədir. Onların başdaşıları saxlanmamışdır. Sinə daşları dördkünc prizmatik formadadır. Burada həmçinin qoç daşlara və sənduqələrə təsadüf olunur. Sənduqələrin bir qismi düzbucaqlı əsas üzərində hazırlanmış və yuxarıda tağvari formada tamamlanmışdır. Bəzi qəbirlərin üzərində Ərəb əlifbası ilə kitabələrə təsadüf edilir. Qəbirlərdən birinin yan tərəfində Azərbaycanın Orta əsr təsviri sənəti üçün хarakterik olan tüfəng və qılınc təsvir edilmişdir. Qoç daşları xüsusilə yüksək sənətkarlıqla hazırlanmışdır. Onlardan birinin üzərində ох işarəsi vardır. Оxun о biri ucu oval dairə ilə tamamlanır. Göydərə nekropolunu 13–17 əsrlərə aid etmək olar.

Nekropol Naxçıvan ərazisində orta əsrlər nekropol mədəniyyətinin öyrənilməsi baxımından əhəmiyyətlidir.