Qısa forşlaq, qarmağı qısa xətlə cızılmış kiçik şəkildə səkkizlik notdan ibarətdir. İfa zamanı bu xırda not əsas notun vəzni hesabına daxil olur. Qısa forşlaq sadə və mürəkkəb olmaqla iki, üç, hətta dörd və beş kiçik notdan da əmələ gələ bilər. Son zamanlar elə qısa forşlaqlar da yazılır ki, onlar əvvəlki notun hesabına ifa olunur.

Uzun forşlaq – Melodiyanın hər hansı əsas səsindən sekunda məsafəsində yuxarıda və ya aşağıda yerləşən köməkçi səslərdən ibarət olur. Uzun forşlaq əsas səsin əvvəlində kiçik not şəklində yazılır və əsas səs ölçüsünün yarısına bərabər olur. Uzun forşlaqı göstərən notun yan xətti həmişə yuxarı şəkildə cizgisiz olaraq yazılır. Hal hazırda bəstəkarlar uzun forşlaqdan öz əsərlərində istifadə etmirlər.