Eçizen yengəci Fukui prefekturasının tanınmış yengəc çeşididir. Eçizen yengəclərinə həsr olunmuş bu muzey 15 iyul 2000-ci ildə açılmışdır. Fəaliyyətinin ilk ilində 125.000 ziyarətçi, ilk 15 ilində isə 584.000 ziyarətçi qəbul etmişdir. 2015-ci ilin sentyabrında muzey birinci mərtəbədəki yenidənqurma işləri səbəbilə bağlanmış, 15 iyul 2016-cı ildə yenidən açılmışdır. Yenidənqurma işləri üçün 392 milyon yen xərclənmişdir.

Muzeydə yengəclərin yaşayış ekologiyasını nümayiş etdirən sərgilər yerləşir. Muzeydə yerləşən yengəc ovu simulyasiyasında ziyarətçilər virtual yengəc ovu ilə məşğul ola bilirlər. "Böyük sevgi teatrı"ndakı 3x10 metr ölçüsündə olan ekranda yengəclərin ekologiyası və bəhs edən videomateriallar nümayiş etdirilir. 45 kv. metr sahəyə malik olan "Yengəc laboratoriyası"nda yengəc balalarının yetişdirilməsi ilə məşğul olunur. Ziyarətçilər laboratoriyaya daxil ola bilməsələr də, yengəc balalarının inkişafını monitordan müşahidə edə bilirlər. Muzeyin tunel akvariumu 14 metr uzunluğundadır və sualtı dünya atmosferi yaratmaq üçün mavi işıqlandırmadan istifadə olunmuşdur.

Muzeydə yengəclərlə bağlı incəsənət sərgiləri baş tutur, nadir yengəc növləri nümayiş etdirilir, yengəclərlə bağlı elmi tədqiqatlar aparılır.

Muzey kompleksi üç tikilidən ibarətdir: inzibati, restoran və muzey binası. Muzeyin eksteryeri yengəc formasında dizayn edilmişdir. Üçmərtəbəli günbəz tikilinin mərkəz hissəsi yengəc qabığını, hər iki tərəfindən yerləşən ikimərtəbəli binalar yengəcin ayaqlarını xatırladır. Muzeyin hər bir mərtəbəsi bir okean səviyyəsini təmsil edir. Üçüncü mərtəbə qurunu, ikinci mərtəbə 100 metr dərinliyi, mərtəbəsi 200 metr dərinliyi, birinci mərtəbə isə 300 metr dərinliyi və okean yatağını simvolizə edir. Ziyarətçilər yengəc sərgisini görmək üçün "qurudan okean yatağına enirlər".

Muzeyin ləqəbi "Böyük sevgi"dir. İngilis dilində "Big love" ifadəsinin yapon dilinə transliterasiyası Bikkurabu (ビックラブ^?) kimi alınır. Yapon dilində yengəcə bəzən kurabu (クラブ^?) da deyilir. Ləqəb 1999-cu ildə keçirilmiş müsabiqəsi nəticəsində 4547 versiya arasından seçilmişdir.

• — Rəsmi saytı