Dadaş Nurulla oğlu Dadaşbəyli 15 iyul 1996-cı il tarixində Qobustan rayonunda anadan olub. 2003–2014-cü illərdə Qobustan şəhəri Aleksandr Osipovic Çernyayevski adına 1 saylı tam orta məktəbdə oxuyub. 2014–2018-ci illərdə Azərbaycan Dövlət Bədən Tərbiyəsi və İdman akademiyasında ağırlıqqaldırma ixtisası üzrə ali təhsil alıb. Məşqlərə hazırda da şəxsi məşqçisi olan Şəmsi Səfərlinin rəhbərliyi altında başlayıb. İlk yarışına 2007-ci ildə Gəncə şəhərindəki yeniyetmələr arasında Respublika birinciliyi olub. İlk uğurunu isə 2009-cu ildə yeniyetmələr arasında Azərbaycan birinciliyinin qalibi olaraq qazanıb.

2010-cu ildə Zirvə Beynəlxalq İdman Klublarının dünya çempionatının bürünc medalçısı olub. 2012-ci ildə gənclər arasında Respublika birinciliyində gümüş medal qazanaraq milli komandaya dəvət alıb. 2013-cü ilin sentyabrında Litvanın Klaypeda şəhərində keçirilən yeniyetmələr arasında Avropa birinciliyində birdən qaldırma və toplamda gümüş, təkanla qaldırmada qızıl medal qazanıb. 2014-cü ilin noyabrında Kiprin Limassol şəhərində keçirilən gənclər arasında Avropa birinciliyində birdən və təkanla qaldırma, həmçinin toplamda gümüş medal qazanıb. 2015-ci ilin oktyabrında Litvanın Klaypeda şəhərində keçirilən gənclər arasında Avropa birinciliyində birdən və təkanla qaldırma, həmçinin toplamda qızıl medal qazanıb.2014–2015-ci illərdə Zirvə Beynəlxalq İdman Klublarının dünya çempionatlarının qalibi olub. 2021-ci ilin aprelində Rusiyanın paytaxtı Moskvada keçirilən ağır atletika üzrə kişilər və qadınlar arasında Avropa çempionatında birdən qaldırma hərəkətində qızıl, toplamda isə bürünc medal qazanıb. 2022-ci ilin aprelində Ağır Atletika Akademiyasının yarış zalında keçirilən Azərbaycan çempionatında 109 kq çəki dərəcəsində birdən-birə 3 (üç) Azərbaycan rekordunu – həm birdən qaldırma, həm təkanla qaldırma, həm də toplamda — qıraraq tarixi nəticəyə imza atıb. 2022-ci ilin avqustunda Türkiyənin Konya şəhərində keçirilən V İslam Həmrəylik Oyunlarında 102 kq çəki dərəcəsində birdən qaldırma hərəkətində gümüş medal qazanıb. 2023-cü ilin avqustunda Belarusda keçirilən II MDB Oyunlarında 109 kq çəki dərəcəsindən bütün rəqiblərini üstələyərək qızıl medala sahib çıxıb. 2023-cü ilin sentyabrında Səudiyyə Ərəbistanının paytaxtı Ər-Riyadda keçirilən ağır atletika üzrə kişilər və qadınlar arasında dünya çempionatında 109 kq çəki dərəcəsində həm birdən, həm təkanla qaldırma hərəkəti, həmçinin toplamda bürünc medalı qazanıb. 2024-cü il Bolqarıstanın paytaxtı Sofiyada keçirilən ağırlıqqaldırma üzrə Avropa çempionatında 109 kiloqram çəki dərəcəsində 3 qızıl medal qazanmışdır.

2015-ci ilin oktyabrında Litvanın Klaypeda şəhərində keçirilən gənclər arasında Avropa birinciliyində çempionatın ən yaxşı idmançısı adına layiq görülüb. 2023-cü ilin sentyabrında Səudiyyə Ərəbistanının paytaxtı Ər-Riyadda keçirilən dünya çempionatında bürünc medal qazanaraq azərbaycanlı idmançıların 18 illik uğursuzluq seriyasına son qoyub.

Təltifləri

Dadaş Dadaşbəyliyə 2022-ci ildə idmandakı fəaliyyəti yüksək qiymətləndirilərək Azərbaycan Respublikasının prezidenti İlham Əliyev tərəfindən mənzil hədiyyə edilib.

•  (ing.)