O, bəlkə də, 90-cı illərdə İtaliyanın ən yaxşı qapıçısı idi və bu müddətdə "Sampdoriya" (1987-94) və "İnter"in (1994-99) şərəfini qoruyub. Palyuka 1990-cı il ev mundialında "Skuadra Azzura"nın heyətində olmasına baxmayaraq, onun yığmadakı debüt oyunu 1991-ci ildə, İsveçdəki turnedə baş tutub. Ümumilikdə, Canluka millidə 39 matç keçirib və 27 qol buraxıb. 1999-cu ildə qolkiper "İnter"i "Bolonya"ya dəyişməklə kiçik vətəninə qayıdıb.

Ötən mövsümün başlanğıcından əvvəl qapıçı yenidən "A" Seriyasında çıxış etmək üçün "Askoli" ilə anlaşdı. Əvvəlcə hər şey yaxşı gedirdi. Palyuka 23 oyunda start fitindən final fitinə qədər meydanda oldu. Sonuncu görüş fevralın 18-nə təsadüf edir. Məhz bu qarşılaşma kiperin 2000-ci ilin 11 martından başlayan möhtəşəm seriyasına (o, ardıcıl 257 oyunda əvəz edilməmişdi) son qoydu. Sonra isə "Askoli"nin baş məşqçisi Nedo Sonetti daha Palyukaya az etibar etməyə başladı və yunan Elefteropulosu əsas heyətə salmağa üstünlük verdi.

Dünya çempionatının gümüş və bürünc mükafatçısı (1994 və 1990), İtaliya çempionu (1991), Ölkə Kuboku (1988, 1989, 1994) və Superkubokunun sahibi (1991), Kuboklar Kuboku (1990) və UEFA Kubokunun (1998) qalibi.