Caner Cindoruk 17 aprel 1980-ci ildə Adanada anadan olub. Anası Müşərrəf, atası isə iki dəfə Orhan Kamal Hekayə Mükafatı almış qısa hekayə yazarı Zəfər Dorukdur. Ana tərəfdən Yörük, ata tərəfdən Kürd əsillidir. Münir Can Cindoruk və Taner Cindoruk adlı iki qardaşı da aktyor olan Cindoruk ailəsinin də təsiri ilə teatra üz tutub. Əmisi Erdal Cindoruk da teatr aktyorudur. Onun demək olar ki, uşaqlıq illəri kulisdə keçib. Orta məktəb, universitet illərində oynadığı tamaşalarda həmişə özünə səhnə tapıb. O məktəbi bitirdikdən sonra təhsilinə Çukurova Universitetində davam edib və oranı bitirib. İlk peşəkar rolu "Fehim Paşa Konağı"-daki Yusuf obrazıdır. 1997-ci ildə Adana Seyhan Bələdiyyəsi Teatr Qrupu ilə ilk peşəkar teatr tamaşasında çıxış edib. On il Seyhan Bələdiyyəsi və Adana şəhər teatrlarında aktyor kimi çalışıb.

2006-cı ildə dörd uşaqlıq dostu ilə İstanbula gəlib. 2006-cı ildə kino karyerasına "Beynelmilel" filmi ilə başlayıb; O, bu filmdə Özgü Namal ilə birlikdə rol alıb. 2008-ci ildə "Kelebek" filmində rol alıb. 2007-ci ildə "Kara Güneş" serialı ilə seriallarda çəkilməyə başlayan Cindoruk, 2008-ci ildə "Geç Gelen Bahar" və "Yaprak Dökümü" seriallarında rol alıb. "Yaprak Dökümü"-də canlandırdığı Doktor Nazmi obrazı böyük marağa səbəb olub. 2009-cu ilin yayında başlayan və Orhan Kamalın unudulmaz eyniadlı əsərindən uyarlanan "Hanımın Çiftliği" serialında Caner Cindoruk Kamal rolunu canlandırıb və serialdakı rol yoldaşı Mehmet Aslantuğ və Özgü Namaldır.

2012-ci ildə Ebru Özkanla birlikdə oynadığı "Pandaların Hikayesi" adlı teatr tamaşasında oynayıb. 2012-ci ildə rejissor Bahman Qobadinin "Gergedan Mevsimi" filmində Yılmaz Erdoğan, Beren Saat və Monika Bellucci ilə oynayıb. 2013-cü ildə Uğur Yücel və Gökçe Bahadır kimi məşhur adlarla "Aramızda Kalsın" serialında baş rolu canlandırıb. 2014-cü ildə rejissor Nesli Çölgeçenin çəkdiyi "Çalsın Sazlar" filmində Belçim Bilgin və Engin Hepileri ilə baş rolları paylaşıb.

2015-ci ildə İraqlı rejissor Hiner Saleem tərəfindən çəkilmiş "Dar Elbise" filmində baş rollarda Tuba Büyüküstün, Hazar Ergüçlü, İnanç Konukçu, Devrim Yakut və Canan Ergüder ilə birlikdə oynayıb. Film 2016-cı ildə buraxılıb.

Caner Cindoruk, prodüseri Türker İnanoğlu olan, Nükhet Duru, Pelin Akil, Cezmi Baskin və Kayhan Yıldızoğlu kimi məşhur adlarla paylaşılan "İstanbulnamə" adlı müzikalda Tulumbacı Eğrikapılı Ali rolunu canlandırıb.

2016-cı ildə rejissor Zeki Demirkubuzun çəkdiyi "Kor" filmində Aslıhan Gürbüz və Taner Birsel ilə baş rolları paylaşan Caner Cindoruk uğurlu aktyorluğu ilə kino tənqidçilərindən tam qiymət alıb. Cindoruk 2016-cı ildə Gizem Karaca ilə baş rolları paylaşdığı "İstanbul Sokakları" serialında rol alıb.

2020-ci ildə Cansu Dere və Melis Sezenlə baş rolu paylaşdığı, Kanal D-də yayımlanan, İngilis istehsalı olan "Doktor Foster" serialının Türkiyə versiyası olan "Sadakatsiz" serialında Volkan Arslan obrazına həyat verib. Serial 25 may 2022-ci ildə finalla başa çatdı.

• 2017: 22-ci Sadri Alışık Teatr və Kino Aktyor Mükafatları - Ən Yaxşı Aktyor - Kor