Cəmilə Qurbanova
Qurbanova Cəmilə Fazil qızı (16 sentyabr 1972, Bakı) — azərbaycanlı professor. Tibb elmləri doktoru.[1] 2013-cü ildən Azərbaycan Respublikası Səhiyyə Nazirliyi Elmi-Tədqiqat Mamalıq və Ginekologiya İnstitutunun direktorudur.
| Cəmilə Qurbanova | |
|---|---|
| Doğum tarixi | |
| Doğum yeri | Bakı, Azərbaycan SSR |
| Vətəndaşlığı |
 Azərbaycan |
| İxtisası | tibb |
| Təhsili |
Azərbaycan Tibb Universiteti Moskva Tibb Akademiyası |
| Fəaliyyəti | həkim, direktor[d], professor |
| Mükafatları |
 |
Qurbanova Cəmilə Fazil qızı 16 sentyabr 1972-ci ildə Bakı şəhərində anadan olmuşdur.
O, 1995-ci ildə Azərbaycan Tibb Universitetini fərqlənmə diplomu ilə bitirdikdən sonra Ş. Ələsgərova adına 5 saylı doğum evində internatura keçmiş, 1996-1998-ci illərdə isə Azərbaycan Tibb Universitetinin Mamalıq və Ginekologiya kafedrasında klinik ordinaturada təhsil almışdır.
1998-ci ildə İ.M.Seçenov adına Moskva Tibb Akademiyasının 2-ci Mamalıq və Ginekologiya kafedrasında əyani aspiranturaya daxil olmuşdur.
2000-ci ildə Rusiya Tibb Elmlər Akademiyasının akademiki A.N. Strijakovun rəhbərliyi ilə "Reproduktiv yaşda yumurtalıqların irinli iltihabi xəstəliklərinin diaqnostika və müalicəsində az invaziv cərrahiyyənin rolu" mövzusunda namizədlik dissertasiyasını vaxtından əvvəl müdafiə etmiş və tibb elmləri namizədi alimlik dərəcəsi adı almışdır. O, elə həmin ildə də İ.M. Seçenov adına Moskva Tibb Akademiyasının Mamalıq və Ginekologiya kafedrasının müdiri akademik A.N. Strijakovun təqdimatı ilə elmi fəəliyyətini davam etdirmək üçün həmin kafedrada doktoranturaya qəbul olunmuşdur.
Ailəlidir. Bir övladı var.
Qurbanova Cəmilə Fazil qızı 2003-cü ildə "Uşaqlıq artımlarının irinli xəstəliklərinin patogenezi, klinikası, diaqnostikası və müalicəsinin yeni aspektləri" mövzusunda doktorluq dissertasiyasını müdafiə etmişdir. 2002-2004-cü illərdə İ.M. Seçenov adına Moskva Tibb Akademiyasının 2-ci Mamalıq və Ginekologiya kafedrasında pedaqoji fəaliyyətlə məşğul olmuşdur.
Həm tibb elmləri namizədi, həm də tibb elmləri doktoru elmi dərəcəsi Azərbaycan Respublikası Prezidenti yanında Ali Attestasiya Komissiyası tərəfindən təsdiq edilmişdir.
2012-ci ildə Azərbaycan Respublikası Prezidenti Yanında Ali Attestasiya Komissiyasının qərarı ilə Qurbanova Cəmilə Fazil qızına Mamalıq və Ginekologiya ixtisası üzrə professor elmi adı verilmişdir.
O, 2003-2004-cü illərdə Moskva şəhərində N.A.Semaşko adına Rusiya Dəmiryol Mərkəzi Kliniki Xəstəxanasının "Ginekologiya" şöbəsində cərrah-ginekoloq vəzifəsində çalışmışdır.
Qurbanova Cəmilə Fazil qızı 2004-2013-cü illərdə Azərbaycan Respublikası Səhiyyə Nazirliyi Elmi-Tədqiqat Mamalıq və Ginekologiya İnstitutunda elm üzrə direktor müavini vəzifəsində çalışmışdır.[2] 2013-cü ildən bu günə qədər həmin müəssisədə direktor vəzifəsində çalışır.
Qurbanova Cəmilə Fazil qızı 2012-ci ildə "Ginekologiya və Perinatologiyanın inkişafına dəstək" qeyri- hökumət təşkilatını təsis etmişdir və hazırkı vaxtadək assosiasiyanın prezidenti vəzifəsində çalışır. Assosiasiyanın təşkilatçılığı ilə 2013-cü ildən hal-hazıradək Bakı şəhəri, Respublikamızın müxtəlif regionlarından və müxtəlif ölkələrdən olan mama-ginekoloqların, neonatoloqların, anestezioloq-reanimotoloqların, cərrahların, genetiklərin, onkoloqların iştirakı ilə 150-dən çox seminar, dəyirmi masa, elmi-praktik konfranslar keçirilmişdir. Onun rəhbərliyi altında "Ginekologiya və Perinatologiyanın İnkişafına dəstək" qeyri-hökumət təşkilatı 2013-cü ildən hazırkı vaxtadək Beynəlxalq Mama-Ginekoloqlar Federasiyasının üzvüdür. Beynəlxalq Mama-Ginekoloqlar Federasiyası (İnternational Federation of Gynecology and Obstetrics – FİGO) 1954-cü ildə yaradılmış və mama-ginekologiya sahəsində olan müalicə və profilaktikaya dair əsas protokolların tərtibində və nüfuzlu konfransların təşkilində aparıcı təşkilatdır. Dünyanın 132 ölkəsinin mama-ginekoloqları, o cümlədən bütün qonşu dövlətlərin bu təşkilatın üzvü olmasına baxmayaraq, Azərbaycan yalnız 2013-cü ildə Qurbanova Cəmilə Fazil qızının rəhbərliyi altında "Ginekologiya və Perinatologiyanın İnkişafına dəstək" qeyri-hökumət təşkilatı vasitəsi ilə müvafiq beynəlxalq təşkilatın üzvü olmuşdur.
Cəmilə Qurbanova şəxsi təşəbbüsü ilə "Ginekologiya və Perinatologiyanın inkişafına dəstək" qeyri-hökumət təşkilatı nəzdində "Müasir Ginekologiya və Perinatologiyanın aktual məsələləri" adlı jurnal təsis edilmiş və O, həmin jurnalın baş redaktoru vəzifəsində çalışır. Həmin jurnal Azərbaycan Respublikası Prezidenti yanında Ali Attestasiya Komissiyasında qeydiyyatdan keçmişdir.
O, "Ginekologiya və Perinatologiyanın inkişafına dəstək" qeyri-hökumət təşkilatının və Azərbaycan Respublikası Ailə, Qadın və Uşaq Problemləri üzrə Dövlət Komitəsi ilə birgə əməkdaşlıq edərək Azərbaycanın müxtəlif regionlarında həkimlərlə treninqlərin keçirilməsində və əhalinin maarifləndirilməsində fəal iştirak etmişdir.
Cəmilə Qurbanova ali dərəcəli həkim cərrah kimi sadə tubektomiyadan tutmuş uşaqlığın ekstripasiyasınadək bütün təcili və planlı əməliyyatları, habelə laparoskopiya əməliyyatlarını həyata keçirməyi bacarır.
Cəmilə Qurbanova Rusiya Ginekoloqlar Assosiasiyasının və Endoskopik Cərrahlar Assosiasiyasının, Avropa Tibb Akademiyasının, Beynəlxalq Mama-Ginekologiya Federasiyasının üzvüdür. O, 183 elmi işin, o cümlədən 11 kitabın və 20 metodik tövsiyənin müəllifidir. Onun rəhbərliyi altında 7 namizədlik və 1 doktorluq dissertasiyası müdafiə olunmuşdur, 14 dissertant isə müdafiəyə hazırlaşır.
Cəmilə Qurbanova 2018-ci ilin mart ayında ictimai və tibbi fəaliyyətindəki roluna görə Azərbaycan Respublikası Prezidenti cənab İlham Əliyev tərəfindən "Tərəqqi" medalı ilə təltif edilmişdir.[3] "Azərbaycan Qarabağ Müharibəsi Əlilləri Veteranları və Şəhid Ailələri" İctimai birliyi tərəfindən 2018-ci ilin noyabr ayında Qurbanova Cəmilə Fazil qızı "Vətənpərvərlik İşində Xidmətlərinə Görə" medalına layiq görülmüşdür. 2018-ci ilin dekabr ayında Böyük Britaniya Oksford Akademik Birliyi və Beynəlxalq Sokrates Komitəsi tərəfindən milli elmin inkişafına verdiyi töhfələrə, regional və qlobal sosial-tibbi problemlərin həllindəki roluna görə Qurbanova Cəmilə Fazil qızı "Name of Science" mükafatına layiq görülmüşdür. Həmin mükafat "Elmi Ad" və "Dünya elminə verilən töhfə"yə görə C.F.Qurbanovanın 21-ci əsrin alimləri siyahısına daxil olduğuna görə fəxri diplomdan ibarətdir. O, 2019-cu ilin iyun ayında elmi-pedaqoji fəaliyyətinə görə Oksford Akademik Birliyinin fəxri professoru adına və "Ginekologiya və Perinatologiyanın İnkişafına Dəstək" assosiasiyasının rəhbəri kimi ictimai fəaliyyətindəki aktivliyinə görə "Rosa Parasels" mükafatına layiq görülmüşdür.[4] Həmçinin 2019-cu ildə elmi-təcrübi fəaliyyətində əldə etdiyi nailiyyətlərə görə Beynəlxalq Elmlər Akademiyasının Azərbaycan bölməsinin akademiki və eyni zamanda tibb və biologiya şöbəsinin müdiri seçilmişdir. 2019-cu il tarixdən C.F.Qurbanova Azərbaycan Respublikası Prezidenti yanında Ali Attestasiya Komissiyası tərəfindən ED2.06 Dissertasiya Şurası Nəzdində "Mamalıq və Ginekologiya" ixtisası üzrə Elmi seminara sədr təyin edilmişdir. Eyni zamanda 2019-cu ildən I Müalicə-Profilaktika fakültəsi üzrə Dövlət Attestasiya Komissiyasının Sədri təyin olunmuşdur. 2020-ci ildə Qurbanova Cəmilə Fazil qızı "Hamiləlik, doğuş, zahılıq dövrlərində ana və uşaq ölümü və ağırlaşmış doğuş hallarının təhlili" üzrə Komissiyanın sədri seçilmişdir. Həmçinin 2020-ci ildən İ.M.Seçenov adına Birinci Moskva Dövlət Tibb Universitetinin Bakı filialında pedaqoji fəaliyyət göstərir.
- ↑ "Klinik, regenerator və translyasion və təbabət üzrə elmi şura". 2021-05-19 tarixində arxivləşdirilib. İstifadə tarixi: 2021-04-21. (#redundant_parameters); (#redundant_parameters); (#redundant_parameters)
- ↑ "Bakıda Beynəlxalq Onkoginekologiya Konfransı keçirilib". 2021-04-21 tarixində arxivləşdirilib. İstifadə tarixi: 2021-04-21. (#redundant_parameters); (#redundant_parameters); (#redundant_parameters)
- ↑ "Azərbaycan qadınlarının "Tərəqqi" medalı ilə təltif edilməsi haqqında Azərbaycan Respublikası Prezidentinin Sərəncamı". 2021-04-21 tarixində arxivləşdirilib. İstifadə tarixi: 2021-04-21. (#redundant_parameters); (#redundant_parameters); (#redundant_parameters)
- ↑ "Elmi Tədqiqat Mamalıq və Ginekologiya İnstitutunun direktoru beynəlxalq mükafata layiq görülüb". 2021-07-18 tarixində arxivləşdirilib. İstifadə tarixi: 2021-04-21. (#redundant_parameters); (#redundant_parameters); (#redundant_parameters)