Brijit Tronyö və şirniyyat mağazaları şəbəkəsinin sahibi Jan Tronyö (1909—1994) və onun xanımı Simonanın (qızlıq soyadı. Puyol, 1910—1998) ailəsində anadan olub. Brijit altı uşaqlı ailənin sonbeşiyi olub, onunla böyük qardaşı arasında 20 yaş fərq var. Zəngin burjua sinfinə aid olan Tronyö ailəsi Amyen şəhərində 1872-ci ildə məskunlaşıb. Ailə burada şokolad və bir neçə yerli qənnadı məmulatlarının istehsalı ilə məşğul olub.

Brijit 1974-cü il iyunun 22-də gələcəyin bankiri Andre Lui Ozyer ilə ailə qurub. Bu zaman onun cəmi 21 yaşı olub. Nikahdan 3 uşaq dünyaya gəlib: Sebastyan (doğ. 1975), Lorans (doğ. 1977) və Tifen (doğ. 1984). Oğlu Sebastyan — mühəndis, qızları: Lorans — kardioloq, Tifen isə vəkil olub. Onlar 2006-cı ildə boşandılar. Brijitin hazırda yeddi nəvəsi var.

Brijit humanitar elmlər sahəsində CAPES sertifikatı aldıqdan sonra ilk öncə Parisdə, daha sonra isə Strasburqda — "Lucie-Berger" protestant məktəbində dərs deməyə başlayıb. O, 1991-ci ildə doğma şəhərinə qayıdıb və burada "La Providence" yezuit liseyində fransız və latın dilləri müəlliməsi kimi işləməyə başlayıb. Brijit 1993-cü ilin mayında qızı Loransın həmyaşıdı və sinif yoldaşı olan Emmanüel Makronla qarşılaşıb. Emmanüel onun ədəbiyyat dərslərinə baş çəkirdi. 1994-cü ildə onların arasında sevgi romanı başlandı. Emmanüelin atası, nevrologiya üzrə professor Jan-Mişel Makron Brijitin oğlu ilə ünsiyyətinə qadağa qoyub. Emmanüelin 17 yaşı tamam olanda valideynləri onu Parisə, IV Henrix adına gimnaziyaya oxumağa göndəriblər. O vaxtdan Makronla Brijit yalnız məktublaşa biliblər.

20 oktyabr 2007-ci ildə Emmanüel Makronla evlənib. Brijitin qızları Lorans və Tifen analarının toyunda iştirak ediblər. Brijit Emmanüel Makronun həyat yoldaşı qismində ictimaiyyət qarşısında ilk dəfə — 2 iyun 2015-ci ildə, İspaniya kralı VI Flipp və onun həyat yoldaşı ilə rəsmi şam yeməyi zamanı görsənib.

Brijit özünü Makronun siyasi karyerasına həsr edib. O, siyasi çıxışların hazırlanmasında Makrona yardım göstərir. Amma Brijit siyasi xadim olmaq niyyətində deyil. O deyir ki, yalnız ərinin yanında olmaq istəyir.

Emmanüel və Brijitin birgə nikahdan uşaqları yoxdur. Mediaya açıqlamasında Makron bildirib ki, onlar Brijitlə uşaq dünyaya gətirməmək qərarı veriblər. Makron bioloji uşaqlara və nəvələrə ehtiyacı olmadığını vurğulayıb.

• Emmanüel Makron