Bülbülölən kəndinin digər qədim adı Kahadır. 1918-ci ildə Azərbaycan türklərindən ibarət əhalisi qovulmuş və kənd dağıdılmışdır. Adının mənası "bülbül olan" yerdir. İranda Bülbülabad, Kəlate-bolbol kənd adları məlumdur. Azərbaycanda və Ermənistanda bir sıra türk mənşəli toponimlərdə "ölən" (ölmək felindən), "olan" (olmaq felindən) və "alan" (almaq felindən) sözləri danışıqda bəzi hallarda təhrifə uğramışdır. Məsələn, Dəvəölən (Dağlıq Qarabağda Çaqazur kəndinin şimalında hündürlüyü 1659 m olan dağ) adında həqiqətən ölən (heyvanın qayadan yıxılıb ölməsi) sözü olduğu halda, Gülalan (Xaçmaz rayonu) kənd adı isə "Göl olan (yer)", Naftalan "neft olan (yer)", Qoçalan çay adı (Qəbələ rayonu) "Qoçu alıb aparan (çay)" mənalarındadır.