Arzu Nehrəmli (azərb. Arzu Kazım qızı Vəliyeva‎; d. 27 oktyabr 1970, Babək r., NMR) — şair, nasir, publisist. Tarix elmləri üzrə fəlsəfə doktoru. Azərbaycan Yazıçılar Birliyinin (2000-ci ildən) üzvü və Azərbaycan Jurnalistlər Birliyinin (2015-ci ildən) üzvü.

Arzu Nehrəmli
Arzu Kazım qızı Vəliyeva
Doğum tarixi (53 yaş)
Doğum yeri Babək r., NMR
Vətəndaşlığı Azərbaycan Azərbaycan
Milliyyəti azərbaycanlı
Həyat yoldaşı Yusif Yaqub oğlu Vəliyev
Uşağı Zübeydə Vəliyeva
Təhsili Bakı Dövlət Universiteti
Fəaliyyəti şair, nasir, publisist

Həyatı

Təhsili

27 oktyabr 1970-ci ildə Naxçıvan Muxtar Respublikasının, Babək rayonunun Nehrəm kəndində qulluqçu ailəsində anadan olub. Nehrəm kənd orta məktəbini əla qiymətlərlə bitirib. Bakalavr, magistratura və doktorantura təhsilini Bakı Dövlət Universitetində (BDU) alıb.

Uşaq yaşlarından idmanla məşğul olur. Naxçıvan Muxtar Respublikasının qadınlardan ibarət yığma basketbol və yüngül atletika komandalarının, eləcə də BDU-nun basketbol komandasının heyətində oynayıb. Hazırda marafon qaçışı ilə məşğuldur. İdman karyerası ərzində dörd dəfə Azərbaycan çempionu olub.

Ailəsi

Arzu Nehrəmlinin fərdi taleyi milli dövlətçilik tariximizin bir parçası kimi əlamətdardır. Onun həyat yoldaşı hərbi təyyarəçi, baş leytenant Yusif Yaqub oğlu Vəliyev 1992-ci ildə vətənimizin azadlığı və bütövlüyü uğrunda döyüşdə qəhrəmanlıqla həlak olub. Övladı Zübeydə Vəliyeva hüquqşünasdır.

Yaradıcılığı

İlk yazıları orta məktəbdə oxuduğu illərdə nəşr edilib. Müntəzəm olaraq respublika, eləcə də Türkiyə mətbuatında müxtəlif janrlı yazılarla çıxış edir. Üç şeir kitabının müəllifidir. “Əbədi sevgi” adlı ilk kitabı 1997-ci ildə nəşr olunub və ədəbi ictimaiyyət tərəfindən maraqla qarşılanıb, kitab haqqında mətbuatda görkəmli elm adamlarının müsbət rəyləri çap edilib.

2001-ci ildə “Tənha qu nəğməsi” və 2017-ci ildə “Unutmağı öyrənirəm” şeirlər kitablarını nəşr etdirib.

Arzu Nehrəmlinin bədii yaradıcılığının bir hissəsini nəsr əsərləri – hekayələr təşkil edir. Bu yazıların əksəriyyəti qafiyələrdən, misralardan, bəndlərdən azad edilmiş şeir kimi oxunur. Ədəbiyyat sahəsində xidmətlərinə görə Azərbaycan Yazıçılar Birliyinin ilə Mədəniyyət və Turizm Naziriliyinin təqdimatı əsasında bir illik Prezident təqaüdünə (2018-ci il) layiq görülüb. Kitab mədəniyyəti tariximizdən bəhs edən tədqiqatı çərçivəsində bir monoqrafiya, 30-dək elmi və publisistik məqalə nəşr etdirib. Türkiyə, RusiyaQazaxıstanda elmi konfranslarda iştirak edib.

Musiqi mətnləri

Arzu Nehrəmlinin 50-dən artıq şeirinə musiqi bəstələnib. “Naxçıvan marşı”nın və “Türk dünyası marşı”nın sözlərinin müəllifidir. Sözlərinə yazılmış mahnıları Xalq artisti mərhum Baba Mahmudoğlu, Şəmistan Əlizamanlı, Təranə Əlixanlı, türk müğənnisi Tuncay Yalın kimi müğənnilər ifa ediblər. Tuncay Yalının oxuduğu “Bu da bir son” (musiqisi Hüseyn Sözlünündür) mahnısına Türkiyədə klip çəkilib. 2017-ci ildə Arzu Nehrəmlinin sözlərinə yazılmış mahnılardan ibarət disk nəşr edilib.

Haqqında yazılanlardan

  • “Arzu sözə ürəyi əsə-əsə, çox məsuliyyətlə yanaşır və deyir ki, şeirim şeir olsun gərək. Əlbəttə, bu, çox yaxşıdır. Sözün mənası və deyiliş tərzinə görə Arzuda nəzərəçarpan yeniliklər var”. Musa Yaqub, Xalq şairi;
  • “Arzu Nehrəmli şairdir. Şeir onun üçün bu böyük dünyanın içində ayrıca bir dünyadır. O, şeir dünyasından böyük dünyaya boylanır, öz pıçıltılarını, ürəyindən axıb gələn, dilindən qələminə süzülən hisslərini, duyğularını, kövrək qəmini, ümid və arzularını misralara çevirir”. Vaqif Yusifli, ədəbiyyatşünas;
  • “Fərqli söz dünyası olan Arzu xanımın yazdıqları söz olmaqdan daha çox yaşanılmış və yaşanılan ömür yolunun, sərt taleyin portretidir, bu taleyi yazan gözəgörünməz qüvvə ilə dialoqdur. Arzu xanımın son vaxtlar yazdığı nəsr əsərlərini ciddi ədəbiyyat faktları hesab edirəm”. Məti Osmanoğlu, ədəbiyyatşünas.

Mənbə

  • XX əsr Azərbaycan yazıçıları. Ensiklopedik məlumat kitabı. Bakı,2011
  • Arzu Nehrəmli. Əbədi sevgi. Şeirlər. Bakı, 1997
  • Arzu Nehrəmli. Tənha qu nəğməsi. Şeirlər. Bakı, 2001
  • Arzu. Unutmağı öyrənirəm. Bakı, 2017
Mənbə — ""

Informasiya Melumat Axtar

Anarim.Az

Sayt Rehberliyi ile Elaqe

Saytdan Istifade Qaydalari

Anarim.Az 2004-2023