Bağırova Arzu Zakir qızı 11 dekabr 1980 tarixində Sumqayıt şəhərində anadan olmuşdur. Orta təhsilinə Sumqayıtda başlamış, Masallı rayonunun Bədəlan kəndində bitirmişdir. Taras Şevçenko adına Kiyev Milli Universitetində Hüquq ixtisası üzrə bakalavr təhsilini bitirdikdən sonra həmin universitetdə Dövlət İdarəçiliyi ixtisası üzrə magistr dərəcəsi almışdır.

Evlidir. 4 övladı, 2 nəvəsi var.

Arzu Bağırova 2005-ci ildən özəl sektorda fəaliyyət göstərir. Hazırda Gözəl Yaşam Mərkəzinin təsisçisidir. Arzu Bağırova şəhid, qazi ailələrinə, o cümlədən fiziki imkanları məhdud şəxslər, tənha, yaşlı, aztəminatlı ailələrə göstərdiyi aktiv fəaliyyəti ilə tanınır. O, onlarla gənc yazarın ilk kitablarını nəşr etməsinə və onlarla gənc rəssamların ilk sərgilərini, yaradıcılıq gecələrinin təşkil olunmasına öz töhfəsini vermişdir. Regionlarda yaşayan onlarla qadının ilk sahibkarlıq fəaliyyətinə başlamasına dəstək olmuşdur. Məktəblilər arasında kitab mütaliəsini artırmaq üçün region kitabxanalarına minlərlə kitab hədiyyə etmişdir. Regional Hüquqi və İqtisadi Maarifləndirmə İctimai Birliyinin (RHİM İB) sədridir.

2019-cu ildə RHİM sədri Azru Bağırovanın dəstəyi ilə Əmək və Əhalinin Sosial Müdafiəsi nazirliyinin əmədaşlığı çərçivəsində görmə imkanları məhdud insanların yaradıcılığının dəstəklənməsi və cəmiyyətə tanıdılması, onların gələcək uğurlara stimullaşdırılması məqsədilə həmin şəxslərin şeirlərindən ibarət "Zülməti dələn işıq" şeirlər antologiyası, "Vətən, Bayraq, Millət" kimi kitablar və kitab-albomları çap olunub.

Həmin ildə Arzu Bağırovanın dəstəyi ilə solo-saz ifaçısı Azər Xanlaroğlunun anım gecəsinə həsr olunmuş "Sazın məcnunu Azər", Tovuz futbolunun 100 illiyi ilə bağlı "100 yaşlı Tovuz futbolu" kitabının təqdimatı və eyniadlı tədbir, Nəsiminin 650 illiyinə həsr olunmuş "Nəsimi yaradıcılığında folklor izləri" kitabı, Sumqayıtın 70 illik yubileyinə həsr olunmuş "Sumqayıtda ədəbi həyat" kitabı,Özbəkistanın tanınmış şairi Xasiyyət Rüstəmin yaradıcılıq gecəsi, Özbəkistan sənətçilərinin "Azərbaycan, Qarabağ və sülh üçün oxu", İraqın mətbuat tarixinə həsr olunmuş "İraq mətbuat tarixi" kitabı və eyniadlı tədbir, "Azərbaycan-Özbəkistan münasibətlərinin və Türk dünyası birliyinin güclənməsində gənclərin rolu" adlı bir sıra mədəniyyət layihələri keçirilmişdir.

O həmin ildə şəhid həsr olunmuş "Qızılqaya qartalı" kitabının nəşrinə və eyniadlı layihəyə, Azərbaycanın Milli Qəhrəmanı Alı Mustafayevin xatirəsinə həsr olunmuş "Alı zirvəsi" filmi,Xocalı soyqırımının tarixi faktlarından bəhs edən "Erməni zindanında səkkiz gün" kitabı və eyniadlı tədbir, Azərbaycan Milli Qəhrəmanı Səfiyar Behbudovun xatirəsinə ithaf olunmuş "Qürur dastanı" kitabı, aprel döyüşləri şəhidi, kəşfiyyatçı, polkovik-leytenant Raquf Orucova həsr olunmuş "Komandir" romanı, Qarabağ müharibəsi zamanı həlak olmuş Masallı şəhidlərinə həsr olunmuş "Şəhidlik Manifesti" kitabı kimi çoxsaylı layihələrə dəstək olub.

Azru Bağırova məktəblilərin maarifləndirilməsi üçün aktiv fəaliyyət göstərir. Həmin ildə müxtəlif məktəblərdə "Milli Dirçəliş Günü", "Uşaqların vətənpərvərlik ruhunda böyüməsində aydınların rolu" kimi layihələrin keçirilməsinə dəstək olmuşdur. Onun təşəbbüsü ilə keçirilən "Evdə qal, kitab oxu" layihəsi çərçivəsində məktəblilərə minlərlə kitab bağışlanmışdır.

Azərbaycan Respublikasının Milli Məclisinin mədəniyyət komitəsinin sədri, millət vəkili Qənirə Paşayevanın müəllifi olduğu kitablardan "Tarixə adını yazan qadınlar" (3 cildlik), "Addım-addım Yaponiya", "Səni Allaha eşq götürür" və digər kitabların çapını və təqdimatını Avrasiya Beynəlxalq Araşdırmalar İnstitutu İB və Regional Hüquqi və İqtisadi Maarifləndirmə İB sədri Arzu Bağırova həyata keçirmişdir.

Arzu Bağırova qadın hüquqlarının müdafiəsi üzrə aktiv fəaliyyəti ilə seçilir. Onun dəstəyi ilə "Qadına qarşı zorakılığa, ailədaxili şiddətə YOX deyək" kimi layihər icra olunmuşdur.

Arzu Bağırovanın dəstəyi ilə təkrar nəşr olunan "Azərbaycan mətbəxində Dolmalar: 381 çeşid" kitabı Dünya Qurman Mükafatı Sərgisində ən yaxşı kulinariya kitabı adına layiq görülüb.

2021-ci ilin sentyabrında Azərbaycan-Özbəkistan arasında ədəbi əlaqələrin inkişafı, Özbək ədəbiyyatının tədqiqi, təbliği istiqamətində fəaliyyətləri, habelə xalqlar arasında dostluq münasibətlərinin inkişafı üzrə Özbəkistan-Azərbaycan Dostluq Cəmiyyətinin Fəxri diplomu ilə təltif olunub.

2021-ci ilin oktyabrında Abşeron rayonunda göstərdiyi fəaliyyətlərinə görə Abşeron Rayon İcra Hakimiyyətinin başçısı tərəfindən və Masallı rayonunda həyata keçirdiyi önəmli layihələrə görə Masallı Rayon İcra Hakimiyyətinin başçısı tərəfindən fəxri fərman ilə təltif edilib.

Arzu Bağırova Azərbaycan Respublikasını təmsil edən nümayəndə heyətlərinin tərkibində qlobal əhəmiyyət daşıyan mövzulara həsr olunmuş bir sıra beynəlxalq konfranslarda iştirak etmişdir, o cümlədən:

• Heydər Əliyev Fondunun Vitse-Prezidenti Leyla Əliyevanın "Xocalıya Ədalət Kompaniyası" çərçivəsində Türkiyənin bir sıra şəhərlərində təşkil olunmuş silsilə tədbirlər.
• 2017-ci ildə Yaponiyanın Tokio və 2018-ci ildə Avstraliyanın Sidney şəhərində keçirilmiş Ümumdünya Qadın Sammiti.
• 2018-ci ildə Tailandın Banqkok şəhərində təşkil olunmuş Asiya-Sakit Okean Regional Konfransı.
• 2018-ci ildə Macarıstanın Budapeşt şəhərində keçirilmiş Turan Qurultayı.
• 2019-cu ildə Şri-Lankanın Kolombo şəhərində keçirilmiş Qadınların Gələcəyi mövzusunda II Beynəlxalq Konfrans.

• Regional Hüquqi və İqtisadi Maarifləndirmə İctimai Birliyinin 2 illik hesabatı. 176 səh. 2020. ISBN 978-9952-414-05-9
• Regional Hüquqi və İqtisadi Maarifləndirmə İctimai Birliyinin 3 illik hesabatı. 112 səh. 2021. ISBN 978-9952-414-11-0
• Regional Hüquqi və İqtisadi Maarifləndirmə İctimai Birliyinin 4 illik hesabatı. 308 səh. 2022.