Ağdaş Dram Teatrı

Ağdaş Dram Teatrı — Nəcəf bəy Vəzirov adına Ağdaşda fəaliyyət göstərmiş Dövlət Dram Teatrı.

Ağdaş Dram Teatrı
Ümumi məlumatlar
Əsası qoyulub	01.01.1940
Yerləşməsi
Ölkə	Azərbaycan SSR
Yerləşir	Ağdaş

Tarixi

1939-cu ilin sonlarında yaradılıb və Nəcəf bəy Vəzirovun adı verilib. İlk tamaşası 1 yanvar 1940-cı ildə Sabit Rəhmanın "Toy" komediyası olub. Bundan sonra Üzeyir Hacıbəyovun Leyli və Məcnun operası səhnəyə qoyulmuşdur. Teatrın bədii rəhbəri ayrı-ayrı vaxtlarda Məmmədəli Qasımov, Cəlil Bağdadbəyov, Yusif Yulduz, Ağəli Dadaşov və İbrahim Qaradağlı olublar. Rəssamlar Bəhram Əfəndiyev, Tələt Şaxtaxtinski, Əsgər Abbasov, Gülməmməd Əliyev, İvan Qorbunov müxtəlif tamaşalara səhnə tərtibatı veriblər. Musiqi hissə müdiri müxtəlif vaxtlarda Əhməd Ağdamski və Əkrəm Əfəndiyev idi. Truppanın üzvləri: Məmmədəli Qasımov, Ümid İsrafilov, Arif Hacıyev, Rasim Səmədov, Əbülqasım Məmmədov, Cəmil İmanov, Ağaisa Məmmədov, Habil Məmmədov, Məhərrəm Novruzov, Qafar İsgəndərov, Rza Nadirov, Ağaibrahim Əzizov, Mustafa Süleymanov, Bəhram Çələbiyev, Böyükağa Abbasov, Məmmədtağı Cəfərov, Yəhya Əhədzadə, Habil İsmayılov, Qəzənfər İsmayılov, Rasim Səmədov, Rəhimə Tağıyeva, Rübabə İmanova, Şərqiyə Pepinova, Səfurə Həsənzadə, Tamara Abbasova, Şəfiqə Hüseynova, Şərqiyə Həsənova, Lyuba İmanova, Yelena Çtanova, Olya Nadirova, Marusya Hacıyeva, Rəhilə Tağıyeva, Cəmilə Bədirli.

Xalq artistlərindən kaman ustası Habil Əliyev (musiqi dəstəsində) və Gəncə Teatrının aparıcı sənətkarlarından olan Sədayə Mustafayeva bir müddət bu kollektivdə çalışıblar. Rejissor və aktyor İbrahim Qaryağdı 17 iyun 1943-cü ildə Azərbaycan Respublikasının əməkdar artisti fəxri adına layiq görülüb.

Teatrın repertuarı

Teatrın əsas repertuarı: "Müsibəti-Fəxrəddin" (Nəcəf bəy Vəzirov), "Dağılan tifaq" (Əbdürrəhim bəy Haqverdiyev), "Vaqif", "Fərhad və Şirin" (Səməd Vurğun), "Ölülər" (Cəlil Məmmədquluzadə), "Almaz", "Sevil", "Oqtay Eloğlu", "Od gəlini" (Cəfər Cabbarlı), "Toy", "Aşnalar", "Xoşbəxtlər" (Sabit Rəhman), "Eşq və intiqam" (Süleyman Sani Axundov), "Partizanlar" (İdris Zamanlı), "Həyat", "Məhəbbət" (Mirzə İbrahimov), "İki cəbhə" (Əzizağa Məmmədov), "Qaçaq Nəbi" (Süleyman Rüstəm), "Şöhrət" (Mehdi Hüseyn), "Arsenal" (Qurban Musayev), "Qız qalası" (Rza Şahvələd), "Qatır Məmməd" (Zeynal Xəlil), "Kür sahilində" (Həsən Qasımov), "Köhnə dostlar" (Leonid Malyugin), "Tələbələrin kələyi" (Brandon Tomas) və s.

Musiqili tamaşalardan: "Leyli və Məcnun", "Əsli və Kərəm", "Arşın mal alan", "Ər və arvad", "Məşədi İbad" (Üzeyir Hacıbəyov), "Evliykən subay", "Aşıq Qərib" (Zülfüqar Hacıbəyov), "Beş manatlıq gəlin" (Məmməd Səid Ordubadi və Səid Rüstəmov), "Gözün aydın" (Məhəmməd Əlizadə və Fikrət Əmirov), "Durna" (Süleyman Rüstəm və Səid Rüstəmov);.