Qocayev İsgəndər İsfəndiyar oğlu
                   (01.06.1965, Saatlı rayonu Azadkənd kəndi 18.01.1994 Kəlbəcər rayonu)
    Qocayev İsgəndər İsfəndiyar oğlu 1965-ci il iyun ayının 1-də Saatlı rayonun Azadkənd kəndində anadan olmuşdur.O,1982-ci ildə Azadkənd orta məktəbini,1983-cü ildə Bakıda 61-saylı texniki peşə məktəbini bitirmişdir.1983-1985-ci illərdə Rusiyanın Çita şəhərində hərbi xidmətdə olmuşdur.Hərbi xidməti başa vurduqdan sonra İskəndər Qocayev Bakıya qayıdır.

1985-ci il iyunun 14-də Ə.C.Əmirov adına Neft çıxarma idarəsinin quyuların yeraltı və əsaslı təmiri sexində operator vəzifəsinə işə götürülür.O,1985-1987-ci illərdə quyuların təmiri üzrə operator,1987-1993-cü illərdə isə usta vəzifələrində işləmişdir.İsgəndər Qocayev işlədiyi vəzifələrdə səylə çalışmış,quyuların yeraltı təmiri kimi olduqca mürəkkəb bir prosesi dərindən mənimsəmiş və nəticədə bacarıqlı bir usta kimi kollektivin hörmətini qazanmışdır.İsgəndər Qocayevin başçılıq etdiyi təmir briqadası uzun müddət “keyfiyyətli və qəzasız təmir” devizi ilə işləyərək işdə yüksək göstəricilərə nail olmuşdu.O zaman İsgəndər Qocayev briqadasının təcrübəsi haqqında mətbuatın tez-tez yazması da təsadüfi deyildi.

   Təəssüf ki, Qarabağ müharibəsi İsgəndər Qocayevi əlimizdən aldı.1993-cü ilin sonuna 2 ay qalmışdı.Düşmənlər Qarabağ ətrafı rayonları artıq işğal etmişdilər.Oktyabrın 30-da sonuncu  Zəngilan rayonu işğal edilmişdi.Buna baxmayaraq işğal edilmiş rayonlarda hələ də döyüşlər gedirdi.Kəlbəcər bu döyüşlərin mərkəzində idi.Az-çox hərb işini bilən əsgərləri məhz Kəlbəcərə göndərirdilər.O zaman Qarabağa ən çox hərb işini bilən könüllülər gedirdilər.Müharibədəki məğlubiyyətimiz ona ağır təsir etmişdi.Dəfələrlə cəbhəyə getmək arzusunda olduğunu bildirsə də , qabaqcıl usta oldğundan onu buraxmaq istəmirdilər.Lakin onu saxlamaq mümkün olmadı.1993-cü il noyabrın 1-də İsgəndər Qocayev könüllü Qarabağa yola düşdü...
    İsgəndər Qocayev 701 nömrəli hərbi hissənin tərkibində Kəlbəcər istiqamətində gedən ağır döyüşlərdə iştirak etdi.Mərdliklə vuruşurdu.Ən çətin döyüşü komandir ona etibar edirdi.2 ay müharibədə az müddət deyil,insan hər dəqiqə ölümlə üz-üzə gəlir.Elə 12 kəndin azad edilməsi zamanı da ölüm təhlükəsi böyük idi.Xoşbəxtlikdən onun iştirak etdiyi dəstə ağır döyüşlərdə iştirak etsə də hələ itki verməmişdi.Hər döyüşdən sonra komandir onlara “Siz şir ürəkli adamlarsınız” deyirdi.Lakin müharibə elə müharibədir.Düşmən gülləsi şiri də məhv edir.
  1994-cü il yanvarın 18-də İsgəndər Qocayevin iştirak etdiyi dəstə Murovdağa növbəti əməliyyata göndərildi.Qarlı,şaxtalı gün idi.Əməliyyat gecə aparılmalı idi.Dəstədə Murovdağ aşırımlarını yaxşı bilən bələdçilər var idi.Əməliyyat uğurla keçdi.Düşmənin silah anbarı,xeyli canlı qüvvəsi məhv edildi.Lakin əməliyyat  itkisiz keçmədi.Dəstənin bir necçə döyüşçüsü yaralandı,biri isə şəhid oldu.Şəhid olan igid döyüşçü Qocayev İsgəndər İsfəndiyar oğlu idi.Dostları onun meyidini qərargaha çatdıranda sabah təzəcə açılırdı.
   Qocayev İsgəndər şəhid olanda 30 yaşı hələ tamam olmamışdı.

Qocayev İsgəndər İsfəndiyar oğlu 1994-cü il yanvarın 20-də anadan olduğu Saatlı rayonun Azadkənd kəndində dəfn olunmuşdu.Onun xatirəsi əbədiləşdirilmişdir: Lökbatan qəsəbəsində 6-ci massivin 7-ci küçəsi onun adını daşıyır.İşlədiyi idarənin qarşısında ucaldılmış xatirə lövhəsində onun şəkli Şəhid dostları cərgəsindədir.

•  
  Caption1
•  
  Caption2

</gallery>