Xəzərin sahilində doğulub, Xəzəri, onun xəfif-xəfif titrəyən mirvari ləpələrini, hər səhər doğmalıqla, məhəbbətlə üz-gözünü oxşayıb hal-əhval tutan mehriban xəzrisini sevməmək mümkün deyil. Biz bu məhəbbətlə doğuluruq. Və bu məhəbbətin qüdrətindən, gücündəndir ki, mavi gözlü Xəzərimiz də ögey-doğmalıq eləmədən hər birimizi daha artıq məhəbbətlə sevir. Biz çox, Xəzər tək... Amma nə sirdir ki, onun bu sevgisindən hamımıza pay düşür.

Xəzər dənizi böyük həcmdə hidrokarbon ehtiyatlara malikdir. Bundan başqa dənizdə böyük həcmdə təbii qaz ehtiyatları var. Xəzərin hidrokarbon ehtiyatlarının çıxarılmasında ətraf dövlətlər və xarici korporasiyalar fəal şəkildə iştirak edirlər. Bu gün Xəzər Dənizi dünyada enerji təhlükəsizliyində əsas rol oynayan regionlardan biridir. Xəzərdə hasil olunan enerji resursları həm sahil ölkələrinin, həmdə ətraf regiona daxil olan ölkələrin inkişafında vacib rol oynayır.

Xəzərin qumlu çimərlikləri əhalinin sevimli istirahət yeridir. Xəzərin zümrüd suyu, “qızıl” qumu, ultrabənövşəyi günəş şüaları yay aylarında turistləri cəlb edir. Xəzər dənizinin fauna və florasının özünəməxsus zənginliyi var. O başqa dəniz və göllərdən seçilir. Xəzərin faunası tipik dəniz faunasından ciddi fərqlənir. Xəzərin sahil zonasında üç qoruq yaradılmışdır: Azərbaycanda Qızılağac, Rusiyada Həştərxan, Türkmənistanda - Xəzər . Xəzərdə 920-ə yaxın heyvan növü yaşayır. Xəzərdə onurğalıların 79 növü mövcuddur.Bunlardan başqa Xəzərdə 101 balıq növü də mövcuddur. Xəzər dənizinidə, nərə, uzunburun, qaya balığı, ağ qızılbalıq, qızıl balıq, Xəzər siyənəyinin beş növü, dəniz sıfı, ziyad, gülmə, çəki, xəşəm və başqa balıq növləri var.