Luiş Froiş 1532-ci ildə Portuqaliyanın Lissabon şəhərində doğulmuş və təhsilini Portuqaliya kralı III Conun sarayında almışdır. Onun dayısı Bartolomeu Froiş saray mirzəsi idi. O, 1548-ci ildə Lissabonda yerləşən Müqəddəs Antoni Kolleci vasitəsilə Yezuitlər ordeninə daxil olmuşdur. Həmin ilin 17 mart tarixində Qaspar Barzeo ilə birlikdə Hindistanın Qoa şəhərinə yola düşmüş və səyahətin iki ayını Mozambikdə keçirdikdən sonra 4 sentyabrda şəhərə çatmışdır. Burada Yaponiyaya doğru yola düşməyə hazırlaşan Fransisk Ksaveri ilə tanış olmuşdur.
Froiş 1550-ci ildə Hindistanın şimalında yerləşən Bassein şəhərinə göndərilmiş və 1551-ci ilin noyabrında Qoaya qayıtmışdır. 1552-ci ildə Qoa haqqında xəbərlər yazmaqla vəzifələndirilmişdir. 1554-cü ilin martında Fransisk Ksaverinin cəsədinin Şançuan adasından gətirilməsinə şahidlik etmişdir. Rahib Belçior Nunes Barreto ilə birlikdə Yaponiyaya yola düşmüş, lakin Froiş Mallakada qalaraq onunla Yaponiyaya getməmişdir. 1557-ci ildə Yaponiyadan qayıdan Barreto ilə birlikdə Qao şəhərinə qayıtmışdır. 1557-58-ci illərdə humanist və latın dili müəllimi Markos Nunesdən dərslər almışdır. 1558-60-cı illərdə isə Manuel Teyşeyra, Antonio de Kuadros və Fransisko Kabral kimi rahiblərdən fəlsəfə dərsləri almışdır.
Froiş 1561-ci ildə Qoa şəhərində rahib olmuş, lakin teologiyanı öyrənməyə davam etmişdir. 1562-ci ildə Yaponiyaya doğru yola düşmüş, yolda Makaoda dayanmışdır. 6 iyul 1563-cü ildə gecə vaxtı Pedro Querronun gəmisi ilə Omura Sumitadanın nəzarəti altında olan Yokoseura limanına daxil olmuşdur. De Monte və Migel Vaz da onunla eyni gəmidə Yaponiyaya gəlmişdirlər. Onlar Kosmo de Torres tərəfindən qarşılanmış və 200 nəfərin müşayiəti altında yenicə tikilmiş bir kilsəyə getmişdirlər.
Froiş dərhal yapon dilini öyrənməyə başlasa da, vəziyyət qeyri-stabil olduğu üçün Joao Fernandes ilə birlikdə xristian bir şəxs tərəfindən idarə olunan Takuşima adasına göndərilmişdir. 1564-cü ilin sentyabrında Hiradoya gəlmiş və Tome Korreyaya məktub yazmışdır. Froiş torpaqlarının yenidən evengelizasiyasını qəbul etməsi üçün Hirado daymyosunu razı salmışdır. Həmin il Kosme de Torres tərəfindən Kioto şəhərinə missiya başçısı olaraq göndərilmişdir. O, 10 noyabr 1564-cü ildə Luis de Almeyda ilə birlikdə Hiradodan ayrılmışdır.
Froiş 31 yanvar 1565-ci ildə Kioto şəhərinə çatmışdır. Vilela onu yaponəsilli kor xristian Lourenço ilə tanış etmişdir. Froiş Vilela ilə birlikdə xristianların paytaxtdakı qoruyucusu olan şoqun Aşikaqa Yoşiterunu ziyarət etməyə getmiş və ona hədiyyələr təqdim etmişdir. Froiş Kiotodakı səyahəti zamanı şəhərin bağlarını və məbədlərini təsvir etmişdir. 17 iyunda Aşikaqa Yoşiterunun ölümündən sonra Froiş və digər xristianlar təqiblərə məruz qalmış, buna görə də Kiotonu tərk etməyə məcbur olmuşdur.
Froiş 1565-69-cu illəri Lourenço ilə birlikdə Sakay şəhərində keçirmiş və heç bir avropalı ilə əlaqə qurmamışdır. O, Sakaya səyahət edən Kioto xristianlarına dəstək göstərmişdir. 1569-cu ildə Vada Koremasanın köməkliyi ilə Oda Nobunaqadan Kiotoya qayıtmaq barədə icazə etmişdir. Nobunaqa onu qəbul edərək yeni şoqun Aşikaqa Yoşiaki üçün tikilən Nico sarayını göstərmişdir. Froiş Nobunaqaya şirniyyatlar və mum şamlar hədiyyə etmişdir. Nobunaqa onun Kiotoda yaşaması üçün icazə vermişdir. Lakin buddist keşişlərinin törətdiyini təhlükəyə görə Froiş onunla yenə görüşmək üçün Gifuya getmişdir. Nobunaqa onu qarşılamış və onu Gifu qəsrinə dəvət etmişdir.
Froiş 1569-76-cı illərdə Kioto yaşamış və burada bir çox məktub yazmışdır. Onun məktubları Romada tərcümə olunmuş və nəşr olunmuşdur. Froiş məktublarında Kiotonun siyasi qeyri-stabilliyini və Nobunaqanın güclənməsini təsvir etmişdir. Kiotoda yaşayarkən bir neçə dəfə Sakaya getmiş və burada da məktublar yazmışdır. Froiş Kabralın 1572 və 1574-cü illərdəki Kioto ziyarətlərini zamanı onun üçün tərcüməçilik etmişdir.