Səfurə Çərkəzqızı

Səfurə Çərkəzqızı (Orucova) 1973-cü ildə Cəbrayıl rayonunun Böyük Mərcanlı kəndində doğulub.  1990-cı ildə Böyük Mərcanlı kənd orta məktəbini bitirib. 1992-97-ci illərdə Bakı Dövlət Universitetinin jurnalistika fakültəsində təhsil alıb. 2003-cü ildə “Qərb jurnalistikası məktəbinin ekspert kursu”nu bitirib.

1993-cü ildə - hələ tələbəykən “P.S. Gənclik” qəzeti ilə əməkdaşlığa başlayıb.  Müxtəlif zamanlarda  “Millət“, 7 gün”,  “Rezonans”, “Həftə içi” qəzetlərində  müxbir,   mədəniyyət şöbəsinin müdiri, redaktor, baş redaktorun müavini vəzifələrində çalışıb. “Kaspi”, “Bizim əsr” qəzetləri ilə də bir müddət əməkdaşlıq edib.

2003-cü ildən 2008-ci ilə kimi “Lider” TV-də “Səda” informasiya redaksiyasında əvvəlcə müxbir,  sonra isə regionlar üzrə redaktor vəzifəsində işləyib. “Lider” TV-də  işlədiyi zaman  sənədli filmlər (Ulu Öndər Heydər Əliyevə həsr olunan “Jurnalistlərin dostu”, keçmiş pioner düşərgələrinin sonrakı vəziyyətini əks etdirən “Qıfıl vurulan qapılar” və. s) hazırlayıb.

Sonrakı dövrlərdə “Azvision.az”, “Bakupost.az”, “ Kult.az”, “Tezxeber.az”  “Sim-sim.az”, “Kulis.az” və.s. saytlarda köşə yazıları,  reportajları, müsahibələri, hekayələri dərc olunub.

2014-cü ilin aprelindən  2017-ci ilin avqustuna kimi ARB TV-də məsul redaktor vəzifəsində çalışıb.  

2015-ci ildə hekayələr toplusu olan “And olsun atlara” adlı ilk kitabı işıq üzü görüb.

2016-cı ildəsə “Sevdalılar” adlı ikinci kitabı çapdan çıxıb. Bu kitabda müəllifin jurnalist olaraq qələmə aldığı, zamanla köhnəlməyən araşdırmalar, reportajlar, məşhur sənət adamları, məmurlarla maraqlı, qeyri-rəsmi müsahibələr toplanıb.

2019-cu ilin yanvar ayından Əmək və Əhalinin Sosial Müdafiəsi Nazirliyinin  İctimaiyyətlə əlaqələr və kommunikasiya şöbəsində ictimaiyyətlə əlaqələr sektorunun müdiri vəzifəsində çalışıb.

2020-ci ilin oktyabr ayından Dövlət Dil Komissiyası yanında Monitorinq Mərkəzinin Reklam və KİV-in monitorinqi şöbəsinin müdiri vəzifəsində işləyir.

Azərbaycan Yazıçılar Birliyinin üzvüdür.