Üzeyir Hacıbəyov adına Azərbaycan SSR Dövlət mükafatı
Үзејир Һаҹыбәјов адына Азәрбајҹан ССР Дөвләт мүкафаты
Mükafatın döş nişanı
Ölkə	Azərbaycan SSR
Tip	mükafat
Kimə verilir	mədəniyyət xadimlərinə
Status	verilmir
Statistika
Təsis tarixi	22 yanvar 1966
Ləğv tarixi	1970
İlk təltif	aprel 1967
Son təltif	aprel 1969

Üzeyir Hacıbəyov adına Azərbaycan SSR Dövlət mükafatı — Azərbaycan SSR-də incəsənətin müxtəlif sahələrində fərqlənən mədəniyyət xadimlərinə verilən mükafat. 1966-cı ildə Azərbaycan SSR Nazirlər Soveti tərəfindən təsis edilmişdir. Mükafata layiq görülən şəxslərə "Üzeyir Hacıbəyov Axundov adına Azərbaycan SSR Dövlət mükafatı laureatı" adı, döş nişanı, diplom verilirdi.

Azərbaycan peşəkar musiqi mədəniyyətinin banisi Üzeyir Hacıbəyov adına görkəmli musiqi əsərləri üçün 2500 manat miqdarında və musiqi incəsənəti sahəsində görkəmli elmi-tədqiqat işləri və konsert ifaçılıq fəaliyyəti üçün 1500 manat miqdarında respublika mükafatları təsis olunmuşdur.

Azərbaycan SSR Nazirlər Soveti yanında aşağıdakı tərkibdə Üzeyir Hacıbəyov adına Azərbaycan SSR Dövlət mükafatlarını verən komitə yaradılmışdır:

• Q. Ə. Qarayev — SSRİ xalq artisti, Azərbaycan SSR Elmlər Akademiyasının həqiqi üzvü, Azərbaycan Bəstəkarlar İttifaqının sədri.

• S. İ. Hacıbəyov — SSRİ xalq artisti, Bəstəkarlar İttifaqının sədrinin müavini (komitə sədrinin müavini)
• F. C. Əmirov — SSRİ xalq artisti, Azərbaycan Bəstəkarlar İttifaqının sədrinin müavini
• Ə. D. Abbasov — bəstəkar, Azərbaycan SSR əməkdar incəsənət xadimi
• C. İ. Hacıyev — bəstəkar, Azərbaycan SSR xalq artisti, Üzeyir Hacıbəyov adına Azərbaycan Dövlət Konservatoriyasının rektoru
• Niyazi Tağızadə — SSRİ xalq artisti, Üzeyir Hacıbəyov adına dövlət simfonik orkestrinin baş dirijoru
• R. S. Hacıyev — Azərbaycan SSR Mədəniyyət naziri
• E. Q. Abbasova — musiqişünas, incəsənət elmləri namizədi
• D. X. Danilov — musiqişünas, Azərbaycan SSR əməkdar incəsənət xadimi
• S. Q. Əliyev — Azərbaycan SSR əməkdar artisti, Üzeyir Hacıbəyov adına Azərbaycan Dövlət Konservatoriyası simli alətlər kafedrasının müdiri
• Q. Almaszadə — dövlət mükafatı laureatı, M. F. Axundov adına opera və balet teatrının baş baletmeysteri
• Ş. A. Məmmədova — SSRİ xalq artisti, Üzeyir Hacıbəyov adına Azərbaycan Dövlət Konservatoriyasının professoru
• A. S. Rzayev — "Kommunist" (Azərbaycan dilində) qəzetinin redaktoru

Müəyyən edilmişdir ki, Üzeyir Hacıbəyov adına mükafatlar iki ildə bir dəfə Azərbaycan sovet hakimiyyətinin qurulması günündə Üzeyir Hacıbəyov adına mükafatlar verən respublika komitəsinin təqdimi ilə Azərbaycan SSR Nazirlər Soveti tərəfindən verilir.