Telman Ozanyurd (Abbasov Telman Famil oğlu) 1969-cu ildə yanvar ayının 31-də Cəbrayıl rayonunun Dəjəl kəndində anadan olub. 1976-cı ildə Dəjəl kənd ibtidai məktəbin I sinfinə daxil olmuş, 1980-ci ildən təhsilini Cəbrayıl rayon Şükürbəyli kənd orta məktəbində davam etdirmişdir. 1986-cı ildə orta təhsilini həmin məktəbdə başa vurmuşdur. 1987-1989-cu illərdə Ukrayna Respublikasının Odessa vilayətində hərbi xidmətdə olmuşdur.

1993-cü ildəki məlum Qarabağ hadisələri ilə əlaqədar Beyləqan, Sabirabad rayonlarında yaşamışdır. 1996-cı ildə Bakı Dövlət Universitetinin filologiya fakültəsinə qəbul olmuşdur. 1998-ci ildən Cəbrayıl rayon 11 saylı orta məktəbində ixtisası üzrə müəllim kimi işə başlamış, 2004-cü ildən Sabunçu rayonu ərazisində yerləşən Cəbrayıl rayon 25 saylı tam orta məktəbində ixtisası üzrə müəllim işləyir.

2001-ci ildən abituriyent hazırlığı ilə məşğuldur, abituriyentlərə kömək məqsədi ilə “Azərbaycan dili” dərsliyi üzərində çalışır.

Bədii və elmi yaradıcılıqla məşğuldur. Telman Ozanyurd imzası ilə müxtəlif qəzet, jurnal və toplularda bədii və elmi yazılarla çıxış etmişdir. İnternet əlaqəsi ilə Türkiyə, Kərkük, Cənubi Azərbaycan... qəzet və jurnallarında müntəzəm nəşr olunmuşdur. 2004-cü ildən “Dirili Qurbani” ədəbi məclisinin üzvüdür.

2009-cu ildə "Kimlik" dərgisinin redaktoru vəzifəsində çalışıb.

2010-cu ilin iyun ayından nəşrə başlayan “Yovşan ətri” qəzetinin təsisçisi və baş redaktoru olub.

Ailəlidir, iki övladı var.

Telman Ozanyurd 1991-ci ildən ədəbi yaradıcılıqla məşğuldur. İlk şeirlərini doğulduğu kəndin adı olan "Dəjəlli" nisbəsi ilə yazıb. Uzun və ağrılı illəri arxada qoyan şair müəyyən vaxt kəsimindən sonra, daha dəqiq 2010-cu ildə təxəllüsünü dəyişərək özünə "Ozanyurd" təxəllüsünü götürdü və beləliklə hüdudsuz olan türk dünyasına xidməti amal seçərək bu yolda addımladı. Müxətli dövrü mətbuatlarda, almanaxlarda şeirləri, məqalələri çap olundu, əsərləri oxucu rəğbəti qazandı. Şeir yaradıcılığnda qoşma, gəraylı, qəzəl, hətta sərbəst vəzndə qələmə alınmış əsərlərə də rast gəlmək mümkündür. Ozanyurdun söz dünyasından doğulan "Göy oğlu olmaq istəyirəm", "Ay nur çiləyəndə", "Dahi", "Ey Qoca şərq", "Sevgi nəğməsi", "Şair göndərmə", "Yarımmələk quşlar", "Uşaq şeiri yazmaq olmur" şeirləri oxucular tərəfindən sevilib qiymətləndirilən şeirlərindəndir. Bütün bunlarla bərabər Ozanyurd yaradıcılığında mənsur şeir örnəkləri də diqqəti cəlb edir. Azərbaycan ədəbiyyatı üçün hələ cavan sayılan bu şeir formasının özəlliklərinə yiyələnmiş şair, sözügedən tərzdə dəyərli əsərlər yaratmışdır. "Azərbaycanım", "Addımlar" "Turanın söz üzü" "Çölün fərəh nəğməsi" adlı mənsur şeirləri bu janrın tələblərinə tam cavab verə bilir. Bu şeirlərlə ədəbiyyatımızı inkişaf etdirib zənginləşdirərək yeni mərhələyə yüksəltmişdir.

Telman Ozanyurdun nəsr yaradıcılığı da rəngarəng və maraqlıdır, baxmayaraq ki sənətkar, şair kimi tanınsa da, qələmini epik növdə də sınamışdır. Onun dövrü mətbuatda və almanaxlarda dərc olunmuş "Saralan yox, qaralan yarpaqlar", "Gecənin bəstələnməmiş nəğməsi", Cənubi Azərbaycan ağrılı taleyinə həsr olunmuş "Tut ağacı" hekayələri ustalıqla qələmə alınmışdır və dolğun təsvirlərlə zəngin olan bu əsərlərdə biz oxucular sənətkarın yığcam sözə böyük bir dünya sığışdırdığının şahidi oluruq.

Ozanyurd Ülvi Bünyadzadənin timsalında 20 Yanvar şəhidlərinə həsr etdiyi "Uzaq yolun yolçusu" adlı mənzum pyes də qələmə almışdır. Yaradıcılığında özünəməxsus yeri olan bu əsər sənətkarın yazdığı yagenə pyes nümunəsidir.

Sənətkar Şimallı-cənublu xalqın taleyində kök salmış problemləri dilə gətirən, Türk dünyasını daha da zəngiləştirən müxətlif mövzulu məqalələri ilə də dövrü mətbuatda zaman-zaman çıxış etmişdir.

Telman Ozanyurd 2010-cu ilin iyun ayından nəşrə başlayan “Yovşan ətri” bədii-publisistik qəzetinin təsisçisi və baş redaktoru olmuşdur. Qəzet ölçüsünə görə kiçik, amma dolğun məlumatlarla zəngin olduğu üçün kiçik həcmli qəzet formasının ilkin nümunəsi kimi diqqəti cəlb edir. 2011-ci il sentyabr ayında qəzetin 16-cı-son buraxılışı oxucuların ixtiyarına verildi. Müəyyən səbəblərdən dolayı qəzet öz fəaliyyətini dayandırdı. Qəzet ayda bir dəfə nəşr olunurdu və dəyərli oxuculara pulsuz paylanılırdı. Fəqət mövcud olduğu vaxtlarda ədəbiyyatın inkişafında öz töhvələrini əsirgəmədi. Qəzetdə bir çox tanınmış qələm sahiblərinin bu günki türk dünyasını narahat edən problemlərə müxtəlif aspektlərdən aydınlıq gətirən məqalələri, müsahibələri dərc edilmişdi. "Yovşan ətri" qəzeti qısa zaman kəsiyində yaşasa da ortaya qoyduğu iş zamanla ölçülməzdir. Türk dünyasına, turançılığa sonsuz xidməti hədəf seçən qəzet təsadüfi deyil ki ilk nömrəsində (iyun, 2010) öz amalını açıqca bəyan etdi:

M ə q s ə d i m i z :

• Türk dünyasının mənəvi dəyərlərini qorumaq, keçmişimizə sahib çıxmaq.

• Milli dilimizin imkanlarını xalqa çatdırmaq və sevdirmək.Ədəbi dilimizin fonetik, leksik, qrammatik və üslubi qanunlarına hörmətlə yanaşmaq.

• Sözün bədii normalarına əməl etməklə qərəzsiz yazılar yazmaq.

• Sazlı-sözlü sinədəftər baba-nənələrimizin həyat yolunu dərindən öyrənmək.

• İncəsənət sahələrimiz-mahnı, musiqilərimiz... haqqında publisistik bilgilər vermək, oxucu düşüncəsini zənginləşdirmək.

• Tarixin sınağından çıxmış adət-ənənələri günümüzə yaxın etmək...

1. Cəbrayıl Rayon Təhsil Şöbəsi tərəfindən “Şagirdləri məktəblilərin fənn olimpiadasında fərqləndiyinə görə” adlı Fəxri Fərmanı ilə təltif olunub.(2003)

2. Kompyuter kursunda yüksək dərəcəli sertifikat (2007)

3. Cəbrayıl Rayon Təhsil Şöbəsi tərəfindən “Şagirdləri Respublikanın ali məktəblərinə qəbul imtahanlarında yüksək bal topladığına görə” adlı Fəxri Fərmanı ilə təltif olunub. (2009)

4. Cəbrayıl Rayon Təhsil Şöbəsi tərəfindən “Şagirdləri məktəblilərin fənn olimpiadasında fərqləndiyinə görə” adlı Fəxri Fərmanı ilə təltif olunub. (2010)

5. Azərbaycan Respublikası Təhsil Nazirliyi tərəfindən təşkil olunmuş İxtisasartırma təhsili haqqında treninqlərdə iştirak edib, I dərəcəli sertifikat alıb. (2012)

http:www.azadliq.mobi/a/24497447.html

Evində «Vətən gülü» bəsləyən müəllim kimdir?