Bakı

Azərbaycan Respublikasının Prezidenti H.Ə. Əliyevin 13 iyun  2000-ci il tarixli  fərmanı ilə M.F.Axundov adına APRDƏİ-nin bazasında yaradılmış Bakı Slavyan Universiteti qabaqcıl dövlət təhsil müəssisələrindəndir.

1946-cı ildə SSRİ Xalq Komissarları Sovetinin 2 fevral tarixli 1313 saylı sərəncamı və Azərbaycan SSR Nazirlər Sovetinin 15 may tarixli qərarı əsasında ikiillik M.F.Axundov adına Azərbaycan Dövlət Müəllimlər İnstitutu yaradılmışdır.  İlk tədris ilində instituta 108  tələbə qəbul olunmuş, ştat cədvəli üzrə institutda 28 əməkdaş işləmişdir.

1948-ci ilin 30 iyulunda  Azərbaycan məktəbləri üçün rus dili və ədəbiyyatı müəllimi ixtisasına yiyələnmiş mütəxəssislərin ilk buraxılışı olmuşdur.

1952-ci ildə M.F.Axundov adına Müəllimlər İnstitutu rus dili müəllimləri hazırlığı üzrə dördillik tədris müddətli pedaqoji instituta çevrilmişdir.

1956-1957-ci tədris ilində institut beşillik təhsil sisteminə keçirilmişdir.

1959-cu ilin 14 aprelində  Azərbaycan KP MK və Nazirlər Soveti «Azərbaycan SSR-in ali pedaqoji məktəblərinin istiqamətləri haqqında» qərar qəbul etmişdir. Bu rəsmi sənədə əsasən, M.F.Axundov adına Azərbaycan Pedaqoji Rus Dili və Ədəbiyyatı İnstitutu və Azərbaycan Pedaqoji Xarici İnstitutu bazaları əsasında M.F.Axundov adına Azərbaycan Pedaqoji İnstitutu yaradılmışdır.

1972-ci ildə respublikanın rəhbəri H.Ə.Əliyevin təşəbbüsü ilə və Respublika hökumətinin 2 noyabr 1972-ci il tarixli 362 saylı qərarı əsasında M.F.Axundov adına Azərbaycan Pedaqoji İnstitutunun bazasında eyni adlı Azərbaycan Pedaqoji Rus Dili və Ədəbiyyatı İnstitutu bərpa edilmişdir.

2000-ci ilə kimi tədris prosesində əhəmiyyətli dəyişikliklər baş verməmişdir, əsasən iki ixtisas -  Azərbaycan və rus dilli orta məktəblər üçün rus dili və ədəbiyyatı müəllimləri, 1996-cı ildən isə kiçik qruplarda tərcüməçi, çex, polyak və bolqar dilləri üzrə mütəxəssislər hazırlanmışdır.