Məmmədova Samirə Behbud qızı (Samirə Behbudqızı) mayın 21-də Bakı şəhərində dünyaya gəlib. Nərimanov rayonunda yerləşən 45 nömrəli orta ümumtəhsil məktəbdə, daha sonra M.Ə.Rəsulzadə adına Bakı Dövlət Universitetinin filologiya fakültəsində təhsil alıb. Diplom rəhbəri dosent Telman Həsənovun etirafına görə, “Ə.B.Haqverdiyevin “Xortdanın cəhənnəm məktubları” povestində tənqid hədəfləri” adlı diplom işi digər keyfiyyətləri ilə yanaşı həm də o vaxta qədər işlənməmiş mövzu və latın qrafikalı Azərbaycan əlifbası ilə yazılmış ilk diplom işi kimi əlamətdar olub.
1995-1999-cu illərdə 291 saylı “Araz” Ekologiya Litseyində Azərbaycan dili və ədəbiyyatı müəlliməsi vəzifəsində çalışıb.
Mətbuat sahəsində əmək fəaliyyətinə 1999-cu ildə (2000-ci ildə qəzet fəaliyyətini dayandırana qədər) “Rezonans” qəzetində mədəniyyət yazarı kimi başlayıb. 2001-ci ildən 2009-cu ilədək “Həftə içi” qəzetində “Ədəbiyyat” və “Mədəniyyət” səhifələrinin, silsilə köşə yazılarının müəllifi olub.
2009-cu ilin oktyabrında “Space” telekanalının “Mədəniyyət saatı” verilişinə müxbir vəzifəsinə qəbul olunub. Beynəlxalq Caz Festivalı, M.Rostropoviç Festivalı, teatr premyeraları və qastrolçu truppaların tamaşaları və digər önəmli mədəniyyət hadisələri haqqındakı əhatəli və lakonik reportajları “Mədəniyyət saatı” proqramında nümayişlənib. Həmin ilin dekabrında telekanalın “Hər gün” xəbərlər xidmətinə keçirilməyini bu proqramda mədəniyyət xəbərlərinə yer ayrılmaması səbəbində ixtisaslaşma zəmininin pozulması hesab etdiyinə görə 2010-cu ilin martında müqavilənin müddətinin bitməsini gözləmədən ərizə yazıb işdən azad edilməyini xahiş edib.
2010-cu ilin iyun ayından 2018-ci ilin dekabrınadək Milli.Az informasiya portalı ilə mədəniyyət yazarı qismində əməkdaşlıq edib. Bu müddətdə Milli. Az portalında müsahibələri, teatr və kino premyeralarına aid resenziya və reportajları, araşdırmaları dərc olunub. Həmçinin Milli.Az portalında “Azərbaycanın kino incilərindən” və “Teletamaşalar" layihələrinin müəllifi olub.
2015-ci ilin sentyabrından Mədəniyyət Nazirliyinin “Mədəniyyət.AZ” dərgisi ilə Azərbaycan və rus dilində yazılmış məqalələrin redaktoru və müəllif, 2020-ci ilin fevralından Azərbaycan Kinematoqrafçılar İttifaqının Aki.az saytı ilə mətbuatla əlaqələr, müəllif və tərcüməçi olaraq əməkdaşlıq edir.
Müxtəlif illərdə “Azadlıq”, “Новое время” qəzetlərində, “Kazus” dərgisində, Publika.az , Tezxəbər.az informasiya portallarında məqalə və müsahibələri dərc edilib, “Mərkəz” qəzetində “Mədəniyyət”, “Mədəniyyət” qəzetində isə “Teatr” səhifələrinin müəllifi olub. 2019-cu il martın 1-dən 9-dək Mədəniyyət Nazirliyi və Teatr Xadimləri İttifaqının təşkilatçılığı ilə baş tutan Vaqif İbrahimoğlunun (1949-2011) xatirəsinə həsr edilmiş "Boş məkanın dolğunluğu" 2-ci Eksperimental Tamaşalar Festivalının ekspert şurasının üzvü olub.
Teatrlar və teatr tamaşaları ilə bağlı məqalə və resenziyaları Mədəniyyət və İncəsənət Universitetinin teatrşünaslıq fakültəsinin tələbələri tərəfindən diplom işlərinin yazılmasında istifadə olunur.
Azərbaycan Jurnalistlər Birliyinin, Azərbaycan Teatr Xadimləri İttifaqının, Beynəlxalq Teatr Tənqidçiləri Assosiasiyasının, Azərbaycan Kinematoqrafçılar İttifaqının üzvüdür. 2019-cu ildə A.Şaiq adına Dövlət Kukla Teatrının təsis etdiyi "KUKLA TEATRININ DOSTU" mükafatına, 2020-ci ildə Azərbaycan Teatr Xadimləri İttifaqının təsis etdiyi "TEATR SƏNƏTİNİN İNKİŞAFINDAKI XİDMƏTLƏRİNƏ GÖRƏ" Fəxri Fərmanına layiq görülüb. 2022-ci il martın 10-u Milli Teatr Günündə Teatr Xadimləri İttifaqının "QIZILGÜL" MÜKAFATI ilə, 2022-ci il iyulun 22-si Milli Mətbuat Günündə Peşə bayramı və teatr sənətinin mətbuatda işıqlandırılmasına görə TXİ-nin Diplomu ilə təltif edilib. İSTİNADLAR: