Pərvanə Nizaməddin (1985) Qazax rayonunun Kəmərli kəndində doğulmuşdur. Orta təhsilini Aslan Kəmərli adına Kəmərli kənd orta ümumtəhsil məktəbində almışdır. Pərvanə Nizaməddin həmin məktəbin IX sinifində oxuyarkən "Çaylara nəğmələr anamdan keçib" adlı şeir kitabı işıq üzü görmüşdür (2001) və həmin kitaba görə "Aslan Kəmərli" adına diploma və təqaüdə layiq görülmüşdür. Pərvanə şeir yazmağa kiçik yaşlarından başlamış və ilk şeiri 1998-ci ildə "Xatun" jurnalında, sonra "Sərbəst düşüncə", "Savalan", "Şəkər villası", "Azərbaycan", "Ekspress" qəzetlərində çap olunmuşdur. Şeirləri "Məhsəti" jurnalında ardıcıl olaraq çap olunur.

Türkiyə və Azərbaycan şairlərinin şeirlərindən ibarət "Məhsəti" almanaxının xüsusi buraxlışında, Ümumilli lider, ulu öndərimiz H.Əliyevə həsr olunmuş "Nur heykəli", Dünya Azərbaycanlılarının II qurultayına həsr olunmuş "Can Azərbaycan", "Azərbaycan poeziya çələngi" kitablarında və "Ana" ensiklopedik toplusunda şeirləri çap olunmuşdur. 2003-cü ildən Azərbaycan Kooperasiya İnstitutunun tələbəsidir. 2004-cü ildə AKU-da fəaliyyət göstərən ədəbi dərnəyin üzvü olub. 2005-2007-ci illərdə ədəbi dərnəyin üzvlərinin şeirlərindən ibarət "Ömürdən günlər" kitabının I və II toplusunda şeirləri çap olunub.

2006-cı ildə MŞM-nin "Məhsəti Gəncəvi" fəxri diplomuna layiq görülüb.

İran Mədəniyyət Mərkəzinin "Fatimeyi-Zəhra", İsmət Cəmiyyətinin "Milli heysiyyət", "Kitab Evi" İB-nin "Vətən naminə" diplomlarına və Balkan Yazarlar və Aydınlar Birliyinin mətbu nəşri "Bay" dərgisinin Təşəkkür belgesinə layiq görülüb.

2009-cu ildə "Gecələr xəyallar görüş yerimiz" kitabı işıq üzü görüb.

2005-ci ildən Aslan Kəmərli adına Kəmərli kənd tam orta məktəbində kitabxana müdiri, 2009-cu ildən Qazax rayon Kəmərli Kənd Bələddiyyə üzvüdür.