Nəsirov Əhliman Abdulkərim oğlu-ali kateqoriyalı dövlət məmuru,tütünçülük üzrə mütəxəssis. Əhliman Abdulkərim oğlu Nəsirov 1948-ci il martın 4-də Kürdəmir rayonu Şahbəyli kəndində anadan olmuşdur. O, 1965-1969-cu illərdə Rabitə texnikumunda təhsil almışdır. 1966-cı ildən Bakı Tütün Kombinatında iş fəaliyyətinə başlamışdır. 1978-84-cü illərdə RSFSR-in Krasnodar şəhərində Politexnik İnstitinda “Tütün və çay məhsullarının texnologiyası” ixtisası üzrə təhsilini davam etdirmişdir. 1982-86-cı illərdə Bakı Yeyinti Sənaye Texnikumunda “tütün və çay məhsulları texnologiyası” fənnini tədris etmişdir. 1986-89-cu illərdə Bakı Tütün Kombinatında baş mühəndis olaraq fəaliyyət göstərmişdir. 1993-94-cü illərdə Bakı Tütün Kombinatının direktoru vəzifəsində çalışmışdır. 1995-2002-cü illərdə Ə.Nəsirov biznes fəaliyyəti ilə məşğul olmuşdur. 2003-2004-cü illərdə Dağıstanda Tütün Kompaniyasını qurmuş və baş direktoru vəzifəsində çalışmışdır. 2004-cü ildə Azərbaycan Respublikası Kənd Təsərrüfatı Nazirliyində sektor müdiri və baş məsləhətçi kimi işləmişdir. Əhliman Nəsirov 2005-ci ildən Azərbaycan Respublikası Kənd Təsərrüfatı Nazirliyində “Tütün və alkoqollu içkilər üzrə nəzarət, standartlaşdırma və lisenziya” şöbəsinin müdiri təyin edilmişdir. İşlədiyi müddət ərzində “istehlak bazarında alkoqollu içkilər və tütün məhsullarının yoxlanılması üzrə monitorinq" qrupu rəhbəri olaraq fəaliyyət göstərmişdir. 2009-2013-cü illərdə Azərbaycan Respublikası Kənd Təsərrüfatı Nazirliyinin Aparat rəhbəri təyin edilmişdir. Əhliman Nəsirov 2011-ci ildə Bakıda keçirilmiş FAO-nun beynəlxalq konfransının təşkilat komitəsinin rəhbəri olmuşdur. YAP-ın üzvüdür. Evlidir, 3 övladı var.