Qısaca bu səhifə deyir: Maşın tərcümə ilə töhfə vermək niyyətindəsinizsə, lütfən bunu doğru şəkildə edin. Əks halda, bu, ensiklopediyamız üçün töhfə yox, zərərdir.
Tərcümə alətləri ilə məqalə yaratmaq və töhfə vermək Vikipediyanın ayrılmaz parçasıdır. Lakin tərcümə proqramlarından istifadə edərkən diqqətli olmalısınız. Məzmunu gözdən keçirib müvafiq düzəlişləri etməli və mümkün səhvləri qaydasına qoymalısınız. Bu alətlərdən istifadə ilə vaxtınıza qənaət etmiş olursunuz. Buna baxmayarq, birbaşa maşın tərcüməsi ilə səhifə yaradıb, həmçinin çox kiçik düzəlişlər (orfoqrafik, texniki və vizual kimi) edib onu tərk etməyin. Ümumi məzmunu diqqətli şəkildə gözdən keçirin və məna səhvlərini, qrammatik, leksik, vizual və digər səhvlərinizi düzəldin ki, məqalədəki səhvlər minimum olsun. Bu müddət ərzində səhifəyə {{iş gedir}} şablonu yerləşdirin. Vikipediya könüllü əsaslarla çalışsa da, bu, heç kimə Azərbaycan dilində dilində olmayan səhifələr yaratmağa icazə vermir. Hər nə qədər niyyətiniz xoş qarşılansa da (ki, bunun üçün özünüzcə əsaslı səbəbləriniz ola bilər, amma heç bir şey Vikipediyanın qayda və təlimatlarından irəli deyil), davamlı bu fəaliyyəti göstərməyiniz nəticədə xoş qarşılanmaya və pozucu sayıla bilər. Maşın tərcümədən istifadə edəcəksinizsə, aşağıdakı bölmələrə diqqətlə göz atmağınız tövsiyyə olunur və dərk etməyiniz gözlənilir.
Doğru şəkildə istifadə etmək
Təbii ki, hər birimizin bu alətlərə ehtiyac duyduğumuz və istifadə etdiyimiz anlar olur. Amma təəssüf ki, bu alətlər maşın tərcümə olduğu üçün istənilən nəticəni vermir, birəbir düz tərcümələr etmir. Alətdən istifadə ilə məqalə yaratdığınız zaman onun üzərindən bir daha keçin və uyğun sözləri dəyişərək, əlavə edərək səhifəni qaydasına qoyun.
Faydaları və zərərləri
Faydası odur ki, vaxta qənaət edirsiniz və əllə yazmalı olmursuz. Buna baxmayaraq əllə etinayla yazan redaktorlarımız da var. Odur ki, copy-paste mətnləri səhifələrə yapışdırıb işinizi bitirməyin, "yaratdım, işim bitti" deyib getməyin, müvafiq düzəlişləri edin. Əks halda, məqalədə məna çatışmazlıqları baş verir. Bu da məqaləni "yararsız" hala qoyur, oxuyan heç nə başa düşmür. Beləcə Vikipediyaya töhfə yox, zərər vermiş olunur. Əgər bir səhifəni tərcümə etmək və mövcud olmasını istəyirsinizsə, lütfən onu davamlı digər ad fəzalarında yox, istifadəçi alt səhifənizə köçürün (və ya məqalə istəkləri səhifəsinə də qeyd edə bilərsiniz). İşiniz bitəndən sonra normal ad fəzasında yaradarsınız. Maşın tərcüməsi məzmunu uzun müddət ümumi səhifələrdə saxlamaq olmaz və nəzərə alın ki, həmin səhifələr qısa müddət sonra silinəcək.
Xəbərdarlıqlara məhəl qoymamaq
Nəzərə alın ki, davamlı belə fəaliyyət və xəbərdarlıqlara məhəl qoymamağınız sizin bloklanmağınızla nəticələnə bilər. Əgər maşın tərcümə ilə töhfə verən istifadəçisinizsə və ya düşünürsünüzsə, yadda saxlayın ki, heç kim davamlı sizin fəaliyyətinizi izləmək yaxud yaratdığınız səhifələri düzəltmək məcburiyyətində deyil. Həmçinin sizə irad tutan istifadəçilərə hücum etməyin, onları ittiham və təhqir etməyin, alçaltmağa çalışmayın və onlara qarşı nəzakətsizliyə yol verməyin. Həmçinin qisas məqsədi güdərək onların fəaliyyətində nəsə "səhv" tutmağa çalışmayın. Burada ensiklopediyanı genişləndirmək üçün olun. Onlar sadəcə layihənin inkişafını düşünürlər və bunu şəxsi olaraq qəbul etməyin. Əmin olun ki, onlar sizin kimi digər istifadəçilərə də bu barədə xəbərdarlıqları edirlər. Səbirləri zorlamayın. Siz buna görə Vikipediyanın ümumi işini axsatdığınız və ümumi işə ziyan vurduğunuz, redaktə mühitini pozduğunuz üçün fəaliyyətinizin qarşısı hətta daimi alına bilər. Bunu istəmərik, amma Vikipediyanın inkişafına və normal işinə mane olsanız, qayda və təlimatlar hər şeydən öndə gəldiyi üçün təəssüf ki, məcburuq.
