Əlövsət Qaraca oğlu Əliyev 1956-cı ildə anadan olmuşdur. 1977-ci ildə Azərbaycan Dövlət Universitetinin “Tətbiqi riyaziyyat” fakültəsini bitirərək təyinatla Azərbaycan Elmlər Akademiyası Kibernetika İnstitutunda işə qəbul olunmuşdur. Sonrakı illərdə AEA Avtomatlaşdırılmış İdarəetmə Sistemləri şöbəsində proqramçı, mühəndis, aparıcı mühəndis, 1988-ci ildən qrup rəhbəri, 1989-cu ildən sektor müdiri, 1990-cı ildən laboratoriya müdiri, 2002-ci ildən isə şöbə müdiri vəzifəsində çalışır.

1982-ci ildə Azərbaycan Elmlər Akademiyası Kibernetika İnstitutunun aspiranturasına daxil olmuş və 1986-ci ildə dissertasiya müdafiə etmişdir. O, 08.00.13 – “İqtisadi tədqiqatlarda, planlaşdırma və idarəetmə proseslərində riyazi üsulların və HT-nın tətbiqi” ixtisası üzrə iqtisad elmləri namizədi və 05.13.06 – “Sistemli analiz, idarəetmə və informasiyanın işlənməsi” ixtisası üzrə dosentdir.

1977-1990-cı illər ərzində “RAİS-Azərbaycan” sisteminin layihələndirilməsi və yaradılması ilə bağlı, eləcə də həmin sistemin müvafiq sahə alt sistemlərinin işlənilməsi sahəsində bir sıra mühüm işlərin məsul icraçısı və rəhbəri olmuşdur.

1991-2000-ci illərdə müxtəlif təyinatlı informasiya sistemlərinin yaradılması, informasiya-kommunikasiya sahəsinin iqtisadi-riyazi problemləri, makroiqtisadi proseslərdə, o cümlədən maliyyə-büdcə resurslarının formalaşmasında və paylanmasında, həmçinin bir sıra sosial və təhsil sahələrində yeni informasiya texnologiyalarının tətbiqinin səmərəliliyinin yüksəldilməsi məsələləri, informasiya-kommmunikasiya bazarının vəziyyətinin təhlili və onun inkişaf perspektivinin müəyyənləşdirilməsi və s. kimi məsələlərlə məşğul olmuş və elmi-tədqiqat işi aparmışdır.

Əlövsət Əliyev 2001-ci ildən sonrakı müddət ərzində iqtisadi proseslərdə və idarəetmə orqanlarında İKT-nin tətbiqi xüsusiyyətləri, sosial-iqtisadi sistemlərdə informasiyalaşma problemləri, İnformasiya cəmiyyətinin formalaşmasının elmi-nəzəri əsasları, İKT sahəsinin göstəricilər sisteminin müəyyənləşdirilməsi, cəmiyyətdə rəqəmsal fərqlilliyi yaradan səbəblərin araşdırılması, bilik (rəqəmsal) iqtisadiyyatının əsaslarının öyrənilməsi, humanitar sahələrin informasiyalaşma problemləri, İKT-in humanitar aspektləri və s. kimi məsələlərlə məşğul olmaqda və elmi-tədqiqat işləri aparmaqdadır. O, “E-Azərbaycan” Dövlət Proqramının işlənilməsində, İC və İKT üzrə göstəricilər sisteminin işlənməsində və bir sıra normativ-hüquqi sənədlərin hazırlanmasında fəal iştirak etmişdir.

1986-1994-cü illərdə ADNA-da baş müəllim və dosent, 1992-1994-cü illərdə MPİ-də dosent, 1993-1996-cı illərdə AİSU-da dosent, 1996-2006-cı illərdə "EKONOMİKS" təhsil mərkəzində rəhbər və dosent, 2003-cü ildən isə AMEA İnformasiya Texnologiyaları İnstitutunun Tədris Mərkəzində humanitar bölmənin kuratoru kimi fəaliyyət göstərir.

Elmi əsərlərinin ümumi sayı 76, o cümlədən kitabların sayı 5, xaricdə çıxmış elmi əsərlərin sayı 15-dir. O, müntəzəm olaraq elmi-kütləvi jurnallarda və qəzetlərdə İKT və İC-nin aktual problemləri üzrə məqalələrlə çıxış edir.

Hal-hazırda AMEA İnformasiya Texnologiyaları İnstitutunda şöbə müdiri vəzifəsində işləyir.

Elektron poçtu:

depart8@iit.ab.az , alovsat@iit.ab.az

WWW.ict.az