Vikipediya idarəçiləri sırasına daxil olmaq istəyən istifadəçi eyni zamanda aşağıdakı tələbləri ödəməlidir:

• Azərbaycan dilindəki Vikipediyada qeydiyyat stajı 6 aydan az olmamalıdır;
• redaktələrinin sayı 1000-dən az olmamalıdır.

Bu tələblərə cavab verməyən namizədin qeydiyyat adı hər hansı idarəçi və ya bürokrat tərəfindən səsvermədən çıxarılır və bunun səbəbi barədə namizədə məlumat verilir.

Vikipediya idarəçiliyinə namizədlər aşağıdakı tələbləri ödəməlidirlər:

• Azərbaycan dilindəki Vikipediyada qeydiyyat stajı 1 ildən az olmamalıdır;
• redaktələrinin sayı 2000-dən az olmamalıdır.
• Azərbaycan dilindəki Vikipediyada son 3 ay müddətində aktiv olmalıdır.

Bu tələblərə cavab verməyən namizədin qeydiyyat adı hər hansı idarəçi və ya bürokrat tərəfindən səsvermədən çıxarılır və bunun səbəbi barədə namizədə məlumat verilir.

Vikipediya bürokratı yalnız aşağıdakı tələbləri ödəyən istifadəçi ola bilər:

• 1 il müddətindən az olmayaraq Azərbaycanca Vikipediyanın idarəçisi olmalı və ya Arbitraj Komitəsində fəaliyyət göstərməlidir;
• redaktələrinin sayı 4000-dən az olmamalıdır;
• Azərbaycan dilindəki Vikipediyada son 6 ay müddətində aktiv olmalıdır.

Bu tələblərə cavab verməyən namizədin qeydiyyat adı hər hansı idarəçi və ya bürokrat tərəfindən səsvermədən çıxarılır və bunun səbəbi barədə namizədə məlumat verilir.

Səsvermə hüququna yalnız aşağıdakı şərtləri ödəyən qeydiyyatdan keçmiş istifadəçilər malikdirlər:

• Səsvermə başlayan tarixə kimi Azərbaycan dilindəki Vikipediyada stajı 3 aydan az olmayan istifadəçilər;
• ciddi redaktələrinin sayı 200-dən az olmayan istifadəçilər. Ciddi redaktələrə - sonradan ləğv edilmiş redaktələr, intervikilərin daxil edilməsi (məqalədə başqa intervikilər olarsa), şablonların daxil edilməsi, orfoqrafik səhvlərin düzəlişi, mətnin bölmələrə ayrılması daxil deyil;
• səsvermə başlayan tarixə kimi Azərbaycan dilindəki Vikipediyada son 30 gün ərzində redaktəsi olan istifadəçilər.
• bir neçə istifadəçi adı olan vikipediyaçı yalnız səsvermə hüququ olan bir adla səs verə bilər. Vikipediyaçı əgər istifadəçi adlarının biri ilə səs veribsə və bu ad ilə səsvermə hüququna malik olmadığı ona məlum olubsa, bu zaman digər səsvermə hüququ olan istifadəçi adı ilə səs verə bilər və bu barədə səsvermə keçirilən səhifədə məlumat verməlidir.

İdarəçilərin və bürokratların namizədliyini irəli sürə bilərlər:

• İdarəçi və bürokrat seçkisində səsvermə hüququ olan istifadəçi layiq bildiyi və bütün şərtlərə cavab verən digər istifadəçinin namizədliyini irəli sürə bilər;
• İdarəçi və bürokrat olmaq istəyən və bunun üçün bütün şərtlərə cavab verən istifadəçi öz namizədliyini irəli sürə bilər.

İdarəçiliyə və ya bürokratlığa namizədliyi irəli sürülmüş istifadəçi namizədliyini geri götürdüyünü elan etdikdə, səsvermə dayandırılmış hesab olunur və nəticələr ləğv olunur.

Namizədin öz namizədliyi əleyhinə səs verməsi onun namizədliyinin ləğvinə səbəb ola bilməz.

Qeyd: İdarəçi və ya bürokrat statusunun istifadəçidən alınması ilə bağlı səsvermə, yalnız göstərilən namizədin özü statusdan imtina etmək üçün müraciət etdikdə dayandırılır və bu zaman statusun alınması ilə bağlı müvafiq tədbirlər görülür.

İdarəçinin statusunun alınmasını yalnız səsvermə hüququna malik istifadəçilər tələb edə bilər. Bu məqsədlə istifadəçi, Arbitraj Komitəsinə və ya Vikipediya:İdarəçilərə müraciət səhifəsinə müraciət etməlidir. Müraciət zamanı istifadəçi öz tələbini Vikipediya qaydalarına uyğun olaraq əsaslandırmalıdır. Əks halda onun statusun alınması ilə bağlı tələbi qisas kimi qəbul oluna bilər.

1. İdarəçi və ya bürokratın statusunun alınması ilə bağlı səsvermənin başlanması üçün ən azı 12 fəal istifadəçinin razılığı olmalıdır. Bunun üçün 15 gün müddətində Arbitraj Komitəsinə və ya Vikipediya:İdarəçilərə müraciət səhifəsində müzakirələr aparılmalı, ən azı 12 səsvermə hüququna malik istifadəçi idarəçi və ya bürokratın fəaliyyətindən narazı olduğunu bildirməlidir.

Yalnız bundan sonra hər hansı idarəçi tərəfindən Vikipediya:İdarəçilər səhifəsində (bürokrat statusunun alınması ilə bağlı Vikipediya:Bürokratlar səhifəsində) idarəçi və ya bürokratın statusunun alınması üçün səsvermə başlanılır.

• İdarəçi və ya bürokratın statusunun alınması ilə bağlı səsvermə yalnız fəal istifadəçilərin (min. 12 səs) ümumi razılığı ilə həyata keçirilə bilər.
• Öz "idarəçi bayrağı"ndan imtina etmiş istifadəçi əgər sonradan bu "bayrağı" geri qaytarmaq istəyirsə, yenidən idarəçilik üçün səsvermə keçirilməlidir.
• 3 blok almış istifadəçi blok müddətindən azı 1 il sonra idarəçi seçkisində iştirak edə bilər. İstifadəçinin vaxtı ilə 3 dəfə bloklanması onun seçkidə namizəd kimi iştirakına mane ola bilməz.
• İdarəçi statusu etimad səsverməsi ilə əlindən alınmış istifadəçi səsvermədən azı 1 il sonra yenidən idarəçi səsverməsində namizəd kimi iştirak edə bilər.

Namizədlərin səsverməsində və səsvermə ilə bağlı müzakirələrdə hər bir Vikipediya istifadəçisi yalnız bir qeydiyyat adı ilə iştirak edə bilər. İstifadəçinin bir-neçə qeydiyyat adı varsa və o, səsvermədə digər adları (nikləri) ilə iştirak edərsə, onun bütün qeydiyyat adları səsvermədən çıxarılır və istifadəçiyə xəbərdarlıq edilir.

Səsvermə müddəti yalnız 15 gün olmalıdır. Səsvermənin başlanğıc və son tarixi (gün və saatı) dəqiq göstərilməlidir. Saat göstərilmədikdə, səsvermə müddəti Vikipediya vaxtı ilə saat 00.00 da başlayaraq, göstərilmiş tarixdə saat 24.00-da sona çatmalıdır.

Səsvermə o zaman baş tutmuş hesab olunur ki, idarəçi seçkilərində etibarlı səslərin sayı 15-dən, bürokrat seçiklərində isə 20-dan az olmasın. Səsvermə zamanı "bitərəf" səslər hesablanmır.

Səsvermənin nəticələri aşağıdakı kimi hesablanır: 1) İdarəçiliyə namizəd "lehinə" səslərin 2/3-ni (66,6%), bürokratlığa namizəd isə 3/4-nü (75%) alarsa seçilmiş sayılır. Bitərəf səslər nəzərə alınmır.

2) Bürokratlığa namizəd ən azı 20 və seçkidə iştirak edən və etibarlı sayılan səslərin azı 3/4-nü (75%) çox səsini alarsa o seçilmiş sayılır. Bitərəf səslər nəzərə alınmır.

2) İdarəçi statusunun alınması (status-kvonun dəyişilməsi) ilə bağlı səsvermədə etibarlı səslərin sayının ən azı 2/3-si "lehinə" olduğu halda idarəçinin statusu əlindən alınır. Bitərəf səslər nəzərə alınmır.

3) Bürokrat statusunun alınması ilə bağlı səsvermədə etibarlı səslərin sayının ən azı 2/3-si "lehinə" olduğu halda bürokratın statusu əlindən alınır. Bitərəf səslər nəzərə alınmır.

Səsvermə müddətinin sonunda lazımi miqdarda səslərin toplana bilməməsi halında səsvermə baş tutmamış sayılır. İstifadəçinin idarəçiliyə və ya bürokratlığa namizədliyi dəstəklənməzsə o növbəti dəfə namizədliyini irəli sürə bilər. Eyni tələblə bağlı növbəti seçki 3 aydan tez olmamaqla keçirilə bilər. Namizədlik sayı ilə bağlı hər hansı məhdudiyyət yoxdur.

Səsvermə bürokrat tərəfindən, fəal bürokrat olmadığı təqdirdə isə hər hansı idarəçi tərəfindən yekunlaşdırılır. Yalnız səsvermənin yekunu elan edildikdən sonra bürokrat istifadəçiyə idarəçi və ya bürokrat "texniki bayrağını" təqdim edə bilər. Fəal bürokrat olmadıqda isə statusun təqdim olunması üçün stüardlara müraciət edilməlidir.

Qeyd: Səslərin faizlə, yaxud nisbətlə sayı hesablanarkən tam ədəd alınmazsa, həmin ədəd tam hissəyə qədər yuvarlaqlaşdırılır.