Hörmətli az-viki istifadəçiləri,

Bildiyiniz kimi, ötən həftə, 7-11 avqust 2013-cü il tarixlərində Çin Xalq Respublikasının Honkonq xüsusi inzibati ərazisində sayca doqquzuncu Vikimaniya konfransı keçirildi və həmin konfransda Azərbaycandilli Vikipediyanı az-vikinin 2 idarəçisi təmsil edib. Vikimaniya haqda məlumatı olmayanlar üçün deyim ki, bu, 2005-ci ildən etibarən ildə bir dəfə dünyanın müxtəlif şəhərlərində Vikipediya və digər əlaqəli layihələrin redaktorlarının iştirakı ilə keçirilən beynəlxalq konfransdır. Burada dünyanın onlarla ölkəsindən yüzlərlə vikipediyaçı iştirak edir, Vikipediyanın bu günü və gələcək inkişaf perspektivləri müzakirə olunur, mühazirələr və praktiki görüşlər təşkil edilir.

Builki konfransla bağlı qısa məlumat vermək istərdim. Konfransın ilk 2 günündə DevCamp adlandırılan və əsasən proqramçıların və proqramlaşdırma dilləri ilə işləyə bilən istifadəçilərin görüşləri keçirildi. Burada Vikimedia saytlarının quruluşu, onların təhlükəsizlik məsələsi, xaker hücumlarına qarşı dayanıqlılığı, Vikidata saytı, Vizual redaktor və s. yeniliklər müzakirə edildi.

Avqustun 9-da rəsmi açılış mərasimində Honkonq hökumətinin İnformasiya məsələləri üzrə Baş direktoru Daniel Lai və Vikimedia Fondunun yaradıcısı və Fondun İdarə Heyətinin üzvü Cimmi Uels açılış nitqi ilə çıxış etdilər.

Növbəti mühazirələrdə Vikimedia Fondunun yerli nümayəndəliklərinin son bir ildə gördükləri işlər barədə, Vizual redaktorun perspektivləri, Wiki Loves Monuments layihəsinin nəticələri və davam etdirilməsi, yeni əlaqəli layihə olan Vikisəyahət layihəsi, Vikidata saytı, fərqli dillərdəki vikipediyaların problemləri və bir sıra digər məsələlər barədə məlumat verildi, mühazirələr və seminarlar təşkil edildi.

Bu konfransda əldə edilmiş bilik və təcrübə Azərbaycanda Vikimedia Fondunun yerli nümayəndəliyinin yaradılmasında, Azərbaycandilli Vikipediyada ikili əlifba probleminin aradan qaldırılmasında, azərbaycanlı istifadəçilərin Vikimedia Fondu tərəfindən təşkil edilən onlayn layihələrdə aktiv iştiraka cəlb edilməsində və istifadəçilərin Vikipediyada və digər əlaqəli layihələrdə redaktə prosesində rastlaşdıqları müəyyən problemlərin həll edilməsində faydalı ola bilər.

Hörmətlə,

Wertuose (talk) 05:32, 16 avqust 2013 (UTC)