| Elnur Badalov | |
|---|---|
| Fayl:Elnur Badalov.jpg | |
| Doğum yeri | Bolnisi, Gürcüstan |
| Vətəndaşlığı |
 Azərbaycan
|
| Milliyyəti | azərbaycanlı |
Elnur Yusub oğlu Badalov — azərbaycanlı iş adamı.
Bioqrafiya
Elnur Yusub oğlu Badalov Gürcüstan Respublikasının Bolnisi rayonunda anadan olmuşdur. Bakı şəhərində məktəbi bitirdikdən sonra 2012-ci ildə “Xəzər Universiteti”nə daxil olmuş, Universitetin Fəxri təqaüdü ilə təhsil almış, iqtisadiyyat və menecment fakültəsini iqtisadçı-maliyyəçi ixtisası üzrə fərqlənmə ilə bitirmişdir.
Elnur Badalov peşəkar iş həyatına ilk dəfə (2016-2017-ci illərdə) “Baker Tilly” beynəlxalq audit və konsaltinq şirkətləri şəbəkəsinin Azərbaycandakı filialında maliyyə xidmətləri üzrə məsləhətçi vəzifəsi ilə başlamışdır. O, 2017-ci ildə həmin şirkətdə uğurlu fəaliyyətinə görə “İlin işçisi” olaraq mükafatlandırılmışdır.
Akademik fəaliyyətinə 2017-ci ildə “Barattson” beynəlxalq tədris mərkəzinin Azərbaycandakı filialında başlayan cənab Badalov Chartered Financial Analyst (CFA) proqramı üzrə təlimçi-müəllim kimi fəaliyyətə başlamışdır. O, akademik fəaliyyətini 2020-ci ildən etibarən “BRIDGE Academy” Təlim Mərkəzində davam etdirmişdir. Beynəlxalq CFA® Sertifikatına malik olan cənab Badalovun 2017-ci ildən bu günədək akademik fəaliyyəti boyunca 250-dən çox tələbəsi olmuşdur.
Eyni dövrdə (2017-2020-ci illərdə), cənab Badalov “PAŞA İnvestments” Məhdud Məsuliyyətli Cəmiyyətində investisiya analitiki, baş investisiya analitiki, investisiya üzrə kiçik menecer kimi müxtəlif vəzifələrdə çalışmışdır.
2020-2022-ci illər ərzində “Azərbaycan İnvestisiya Holdinqi”ndə baş strategiya mütəxəssisi, Strategiya və portfelin idarəedilməsi şöbəsinin müdiri, Kommunal xidmətlər portfelinin rəhbəri kimi müxtəlif vəzifələrdə çalışan E.Badalov sonuncu təyinatından öncə yəni, 2022-ci ilin aprel ayından noyabr ayınadək “Təmiz Şəhər” ASC-də Strategiya və İnvestisiya Komitəsinin üzvü vəzifəsində də işləmişdir.
Peşəkar əmək fəaliyyəti ərzində O, 5-dən çox investisiya sövdələşməsində iştirak etmiş, bir neçə dövlət şirkətində transformasiya ofislərinin formalaşdırılmasında, habelə bir sıra şirkətlərin beynəlxalq genişlənmə strategiyalarının hazırlanmasında, problemli aktivlərin maliyyə dayanıqlılığının artırılmasında aktiv rol oynamışdır.
Elnur Badalov 2023-cü ilin fevral ayından etibarən isə “Zəhmət Ruzi” MMC-də (SAB) Baş icraçı direktor vəzifəsinə təyinat almışdır.
İstinadlar
- . Oxu.Az (az.). 4 oktyabr 2023.
- . marja.az (az.).
- . FED.az (az.). 23 fevral 2023.
- . Qafqazinfo (az.). 21 iyul 2023.