Ağa Cəfər oğlu Mehdiyev 1920-ci ildə ornamentlərinin gözəlliyi və zənginliyi ilə məşhurlaşan xalılar, mis qablar, metal məmulatlar, silah hazırlayan sənətkarların çox qədimlərdən şöhrət tapmış dağ qəsəbəsi Lahıcda anadan olmuşdur. Rəssam özünün doğma dağlıq diyarına, onun təbiət və adamlarına olan məhəbbətini bütün ömrü boyu yaşatmış və bu məhəbbətdə yeni-yeni ilham mənbəyi tapmışdır. Lahıc, lahıclılar, dağlar, çobanlar və yaylaqlar onun sevimli motivləridir. A.Mehdiyev 1938-ci ildə Azərbaycan Rəssamlıq Texnikumunu bitirib dərhal Respublikanın rəssamlıq həyatına qoşulmuşdur. O, 1938-ci ildən etibarən bütün respublika və bir çox ümumittifaq sərgilərində iştirak etmişdir. O, öz yaradıcılığında – şəkil, peyzaj, portret janrlarından geniş istifadə etmişdir. 1960-cı ildə Türkiyəyə səfəri A.Mehdiyevin yaradıcılığında nəzərəçarpacaq dərəcədə iz qoymuş, onun sənətini yeni yaradıcılıq nailiyyətləri ilə zənginləşdrmişdir. Bu səfərin parlaq təəssüratı onun əsərlərinin “Türkiyə səfəri” (1961) adlanan şəxsi sərgisində, “Xarici ölkələr Azərbaycan rəssamlarının gözü ilə” (1964) adlanan sərgidə öz əksini tapmışdır. Yaponiyada Azərbaycan incəsənətinin fəal təbliğatçısı olan Nakamura xanım rəssamın 12 peyzajını əldə etmiş və “1976-cı ilin Müasir Rəngkarlığı” sərgisinə onları daxil etmişdir. Ağa Mehdiyevin əsərləri Almaniya, İtaliya, İsveç, Avstriya, Kanada, Fransa, Macarıstan, Rumıniya, Bolqarıstan və Yaponiyada, Polşa, İspaniya, Türkiyə, ABŞ, habelə, Misir, Əlcəzair, Livan, Rusiya, İraq və Yaxın Şərqin digər ölkələrində nümayiş etdirilmişdir. Ağa Mehdiyev 1988-ci ildə Azərbaycan Əməkdar Rəssamı, 2002-ci ildə Azərbaycan Xalq Rəssamı adına layiq görülmüş, elə həmin ildə Prezident təqaüdü ilə təltif olunmuşdur. 1920 - Ağa Mehdiyev, İsmayıllı rayonunun Lahıc qəsəbəsində anadan olmuşdur. 1938 - Azərbaycan Rəssamlıq Texnikumunu bitirmişdir. 1938 - ci ildən respublika və ümumittifaq sərgilərdə iştirak etmişdir. 1944 - SSRİ Rəssamlar İttifaqına üzv qəbul edilmişdir. 1961 - Bakıda "Türkiyə peyzajı" fərdi sərgi. 1947,1955,1959,1963,1965,1970,1981,1988,1997,2000 - Bakıda,Mingəçevirdə fərdi sərgilər. 1988 - Azərbaycan SSR əməkdar rəssamı fəxri adına layiq görülmüşdür. 2002 - Azərbaycan Xalq Rəssamı adına layiq görülmüşdür. 2002 - Prezident təqaüdü ilə təltif olunmuşdur. 2003 - Xalq Rəssamı Ağa Cəfər oğlu Mehdiyev mayın 15-də ömrünün 84-cü ilində vəfat etmişdir.

    Rəssam Ağa Mehdiyev öz yaradıcılığı ilə belə bir müddəanı təsdiq edir: “Gözəllik bizi əhatə edən hər şeydə var. Yalnız onu görməyi və qavramağı bacarmaq lazımdır.”