Chelebi Sara
Sara Əliyeva 1981-ci ildə Qubadlı rayonunda anadan olmuşdur. 1998-ci ildə Səbayel rayonunda yerləşən H.Mahmudbəyov adına 2 saylı Texniki-Hümanitar Elmlər liseyini bitirmişdir. 2003-cü ildə Bakı Dövlət Universitetinin Biologiya fakultəsinin bakalavr pilləsini, 2006-cı ildə isə magistr pilləsini fərqlənmə diplomu ilə bitirmişdir. 2007-2009-cu illərdə AMEA Zoologiya İnstitutunda doktorantura piləsində təhsilini almış, 2012-ci ildə “Şəmkir su anbarı vətəgə balıqları (çəki, çapaq, sıf) körpələrinin biologiyası” mövzusunda dissertasiyanı müdafiə edərək, biologiya üzrə fəlsəfə doktoru elmi adını almışdır..
Elmi fəaliyyətinin ilk dövrlərində AMEA Zoologiya İnstitutunda kiçik elmi işçi (2010),böyük elmi işçi (2013) vəzifələrində çalışmışdır. Zoologiya İnstitutu Gənc Alimlər və Mütəxəssislər Şurasının katibidir. MİK-nın (TQDK) imtahanlarında rəhbər kimi fəaliyyət göstərir. 14 elmi əsəri yerli və xarici jurnallarda dərc edilmişdir.
Tədqiqat apardığı illərdə S.İ.Əliyeva ilk dəfə olaraq Şəmkir su anbarında məskunlaşmış çapaq, çəki və sıf balıqlarının strukturu, çoxalma biologiyası ətraflı tədqiq olunmuş, balıq körpələrinin bioloji xüsusiyyətləri öyrənilmişdir. İlk dəfə olaraq Şəmkir su anbarında çapaq, çəki və sıf körpələrinin su anbarında fəsillər üzrə yayılması, say dinamikası, onlara təsir edən amillər müəyyən edilmişdir. İlk dəfə olaraq çapaq, çəki və sıf körpələrinin sürfə mərhələsindən başlamış iki yaşadək olan dövrlərdə qidalanmaları, böyümələri, inkişaf mərhələlərindən asılı olaraq qida tərkibinin, dolğunluq əmsalının dəyişməsi öyrənilmişdir.