Zeynalov Camal Səməndər oğlu 1942-ci ildə Samux rayonunun Oruclu kəndində Gədəbəyin Miskinli obasının tayfa başçılarından olan böyük xeyriyyəçi və maarifçi Molla Zeynalın oğlu Səməndərin ailəsində anadan olmuşdur. Mingəçevir su anbarının yaradılması ilə əlaqədar olaraq 1953-cü ildə Gəncə (keçmiş Kirovabad) şəhərinə köçmüşlər. Orta təhsilini də buradakı 5 nömrəli məktəbdə almışdır. 1961-ci ildə Azərbaycan Kənd Təsərrüfatı İnsitutunun (indiki Azərbaycan Dövlət Aqrar Universiteti) İqtisadiyyat fakültəsinə daxil olmuş və yalnız əla qiymətlərlə oxuyaraq oranı 1969-cu ildə bitirmişdir (1963-1966-cı illərdə hərbi xidmətdə olmuşdur).

1971-ci ildə ixtisası üzrə Qırmızı Əmək Bayrağı Ordenli Azərbaycan Elmi-Tədqiqat Pambıqçılıq İnstitutunun əyani aspiranturasına qəbul olunaraq Moskva şəhərindəki ixtisası üzrə ölkənin əsas elmi mərkəzi sayılan Ümumittifaq Elmi-Tədqiqat Kənd Təsərrüfatının İqtisadiyyatı İnstitutuna ezam edilmişdir. Dissertasiya işini vaxtından xeyli əvvəl tamamlayaraq onun 1974-cü ildə həmin İnstitutda müdafiə etmiş və iqtisad elmləri namizədi alimlik dərəcəsinə layiq görülmüşdür.

1979-cu ildə müsabiqə yolu ilə Azərbaycan Politexnik İnstitutunun Kirovabad filialındakı (indiki Azərbaycan Texnologiya Universiteti) "İctimai elmlər" kafedrasına Siyasi iqtisad fənni üzrə müəllim seçilmiş, sonra baş müəllim və dosent olmuşdur. 1985-ci ildə 1996-cı ilə qədər Azərbaycan Texnologiya İnstitutunun (indiki ATU) "Siyasi iqtisad" sonra isə 2001-ci ildən 2006-cı ilə qədər "İqtisadi nəzəriyyə" kafedralarının müdiri işləmişdir.

Yüksək ixtisaslı kadrların hazırlanmasında tələbələrin elmi-tədqiqat işlərinə cəlb edilməsinə xüsusi diqqət yetirdiyinə, X və XI Ümumittifaq tələbə işlərinin müsabiqəsində fəal iştirakına görə 2 dəfə Azərbaycan SSR Ali və Orta İxtisas Təhsili Nazirinin əmri ilə (30.05.1984-cü ildə 470 nömrəli və 19.02.1987-ci ildə 167 nömrəli) təşəkkür elan edilmişdir. 1985-ci ildən 1993-cü ilədək (öz fəaliyyətini dayandırana qədər) Azərbaycan Respublikası Təhsil Nazirliyinin “Siyasi iqtisad” fənni üzrə Elmi-metodiki Şuranın üzvü olmuşdur. Həmin dövrdə Azərbaycan KP Kəpəz rayon komitəsinin metodiki şurasının sədri, İnstitutun “Bilik cəmiyyəti”nin sədri kimi fəaliyyət göstərmişdir. 1985-ci ildə Azərbaycan SSR “Bilik” cəmiyyəti İdarə Heyətinin “Təşəkkürnaməsi” ilə təltif edilmişdir. 1986-cı ildə Moskvada keçirilən Ümumittifaq “Bilik” cəmiyyətinin qurultayında Azərbaycanı təmsil edən üç nümayəndədən biri olmuşdur.

1982-ci ildə Belarus Dövlət Universitetinin, 1989-cu ildə isə Moskva Dövlət Universitetinin nəzdindəki İxtisası artırma İnstitutlarında dinləyici olmuşdur. Pedoqoji fəaliyyətlə yanaşı elmi-tədqiqat işini də davam etdirərək 1995-ci ildə doktorluq dissertasiyasını tamamlayaraq, aqrar iqtisadiyyatı sahəsində Qafqazın ən nüfuzlu elm və tədris mərkəzi olan Gürcüstan Aqrar Universitetində müdafiə edərək iqtisad elmləri doktoru alimlik dərəcəsinə layiq görülmüşdür. Dissertasiya işi Azərbaycanın aqrar-sənaye kompleksində bazar təsərrüfatının təşəkkülünün sosial-iqtisadi meyllərinin vəhdət halında öyrənilməsinə həsr olunmuş ilk tədqiqatlardan biridir.

Elmi-araşdırmaları və pedoqoji fəaliyyətinin nəticələri yüzdən çox elmi əsərdə öz əksini tapmışdır ki, onlardan biri monoqrafiya, ikisi dərs vəsaiti, səkkizi tədris proqramıdır. Elmi məqalələrinin bir çoxu xarici ölkələrdə, o cümlədən beşi Moskvadakı mötəbər “Aqrarnaya nauka” jurnalında dərc edilmişdir. Azərbaycan dilində hələlik dərsliyin olmadığı “Mikroiqtisadiyyat” və “Makroiqtisadiyyat” fənnlərindən son illərdə rus dilində nəşr olunmuş ən sanballı dərsliklər əsasında mühazirə mətnləri, tədris proqramları və testlər hazırlanaraq tələbələrin istifadəsinə verilmişdir. Eyni zamanda mühazirə mətnləri və testlərin elektron variantı İnternet saytlarında yerləşdirilmişdir.

Hazırda Azərbaycan Texnologiya Universitetinin “Sənayenin iqtisadiyyatı və idarə edilməsi” kafedrasında işləyir. İki övladı və dörd nəvəsi vardır. Qızı Mətanət fizika-riyaziyyat elmləri namizədi, Gəncə Dövlət Universitetinin “Fizika” kafedrasının dosentidir. Oğlu Elxan dövlət qulluğunda çalışır.