Qarahacı yaşayış məskəni - (bəzən Qarağaclı kimi də işlədilir) Kür-Araz tunc dövrü mədəniyyətinin ilkin mərhələsinə aid yaşayış yeri. Ağdam şəhərindən 3 km. qərbdə, müasir dövr qəbirstanlığı olan sahədə, Qarqarçayın sol sahilində yerləşib. Sahəsi 2 hektara yaxındır. Bir hissəsi Ağdam-Şuşa şosse yolu salınarkən materikə qədər kəsilib. Kəsikdə 1,3 m. qalınlığında mədəni təbəqə aydın seçilir. Bütövlükdə təpənin hündürlüyü 3 m-dir. Hələ 1926-cı ildə İ.İ.Meşaninovun burda çay daşlarından hörülmüş dairəvi hörüklərin olması haqqında məlumat vermiş və onları «kromlex»lər sırasına daxil etmişdir.
80-ci illərdə İ.H.Nərimanov və H.F.Cəfərov abidədə yoxlama tədqiqatı işi aparmışdır. Hər iki halda tədqiqat işi kəşfiyyat xarakteri daşımışdır. Abidənin səthindən, habelə dağılmış sahənin kəsiyindən toplanmış materiallar (saxsı qablara məxsus franmentlər, çaxmaqdaşından qəlpələr və oraq dişləri və s.) Kür-Araz mədəniyyətinin erkən mərhələsi üçün xarakterik əlamətlərə malikdir. Bu mənada qara və boz cilalı, çəhrayı astarlı saxsı qab nümunələri böyük maraq doğurur. Bəzi qab nümunələrinin səthi daraqvari əşya ilə işlənilmiş, başqalarında şabalıdı anqoblama və ya kobud suvaq çəkilmə müşahidə olunmuşdur. İ.H.Nərimanovun fikrincə qeyd olunan tip keramika, Qarahacının səthi sığallanmış açıq-qırmızı rəngli keramikası ilə birlikdə bu tip materiallarla eneolit dövrü keramikası arasında irsi bağlılığın tutulmasına kömək edir. Maraqlıdır ki, bu tip keramika nümunələrində saman qatışığına təsadüf olunmamışdı. Göstərilən əlamətlər Qarabağın Cüttəpə, Üçoğlan, Dəyirmanyeri və b. abidələrində də izlənilmişdir. Bu abidələrdə həm eneolit (səthi gil məhlulu ilə «suvanmış», «daraqvari əşya» ilə işlənmiş qırmızı və ya şabalıdı rəngli qablar), həm də Kür-Araz mədəniyyəti əlamətlərini özündə əks etdirən (qırmızı və boz cilalı, xarakterik lentvari-qövsşəkilli qulplu, üzəri daraqvari əşya ilə işlənmiş qablar) saxsı qab nümunələrinin tapılması bunu sübut edir. Bir qayda olaraq qabların gilində saman və ya başqa bitki qatışığı yoxdur. Ümid etmək olar ki, Qarahacı tipli «bağlı» abidələrdə (burada bir dövrə aid abidə nəzərdə tutulur) aparılacaq sistemli tədqiqatlar gedişində Kür-Araz mədəniyyətinin ilkin mənşəyini açmağa kömək açarı tapılacaq və bu həmin mədəniyyətin eneolit dövrü mədəniyyəti ilə irsi bağlılığını təsbit etməyə kömək edəcək.
Qarahacı əhalisi oturaq həyat keçirmiş, əkinçilik və maldarlıqla məşğul olmuşdur.