İran parlamentində dini azlıqların rezervlənmiş yerləri (fars. حوزه‌های انتخابیه مجلس شورای اسلامی برای اقلیت‌های دینی‎) — İran parlamentində ölkədə yaşayan dini azlıqları üçün ayrılmış millət vəkili yerləri. Hal-hazırda bu məqsədlə istifadə olunan 5 nəfərlik millət vəkili yeri var. Məşrutə inqilabından sonra qəbul edilmiş yeni konstitusiyaya görə ölkədə yaşayan dini azlıq nümayəndələrinə parlamentdə təmsil olunmaq hüququ verilmişdir. Bu hüquq 1979-cu ildə baş verən İran İslam İnqilabından sonrada saxlanılmışdır.

Hal-hazırda 5 nəfərlik millət vəkili mantdatı bütün çağırış parlament seçkilərində sözügedən dini azlıqlar üçün saxlanılır. İran erməniləri ölkə parlamentində 2 nəfər millət vəkili ilə təmsil olunurlar. Şəxslərdən biri ölkənin şimal hissəsində, əsasən Təbriz şəhərində yaşayan lokal erməni icmasından seçilir və şərti olaraq şimal ermənilərini təsmil edir.

Digər etnik erməni millət vəkili isə İsfahan şəhərindəki Yeni Culfa mərkəzli olmaqla şərti olaraq cənub ermənilərindən seçilir və burada yaşayan erməniləri təmsil etməkdədir. Digər üç millət vəkili yeri isə müvafiq olaraq İranda yaşayan aysorlar, yəhudilər və zərdüştlər arasında bölünmüşdür.İranda əsas dini azlıq hesab olunan və ölkə üzrə sayları 350 min nəfərə yaxın olan Bəhai dinin ardıcıları üçün parlamentdə heç bir yer nəzərdə tutulmamışdır.

Ölkədəki sünni müsəlmanlar üçün spesfik olaraq millət vəkiliyi yerləri ayrılmasa da, sünnilər parlamentdə təmsil olunan müxtəlif siyasi partiyaların tərkibində siyasətlə məşğul olmaqdadırlar. İran parlamentində təmsil olunan sünni millət vəkilləri əsasən ölkənin cənub-şərqində yerləşən Sistan və Bəlucistan ostanından seçilməkdədirlər.